एक्सन थ्रिलर फिल्मबाट बलिउडमा डेब्यू गर्दैछन् डेनी पुत्र

बलिउड स्टार डेनी डेनजोंग्पाका छोरा रिंजिंग चाँडै नै बलिउडमा इन्ट्रि गर्ने भएका छन् । सन् १९१९ अप्रिलदेखि छायांकन सुरु हुने फिल्म स्क्वाडबाट उनी बलिउडमा आफ्नो पाइला राख्दैछन् । एक्सन थ्रिलर यो फिल्मको निर्देशन नीलेश सहायले गर्नेछन् ।

फिल्मको तयारी स्वरुप अहिले डेनी पुत्र दिनमा दुई पटक तालिम लिइरहेका छन् । बलिउड हंगामाका अनुसार रिंजिंग एक्सनको तालिम मात्रै दिनमा दुई दुई घण्टाको दरले लिइरहेका छन् ।

छोराले बलिउडमा प्रवेश गर्न लागेको खबरले डेनी निकै खुशी बनेका छन् । धेरैवटा स्क्रिप्ट अस्वीकार गरेपछि मात्रै रिंजिंगले स्क्वाडको स्क्रिप्ट मन पराएका हुन् । छोराले फिल्ममा करियर सुरु गर्न लागेको क्षण परिवारकै लागि गर्वको विषय भएको डेनीले बताएका छन् । छोराका लागि आफुले कुनै सिफारिस नगरेको बताउँदै रिंजिंगले बलिउडमा स्थान बनाउने कुरामा आफु विश्वस्त भएको डेनी बताउँछन् ।

हलिउड स्टार ड्वेन जोहन्सनसँग तुलना

स्क्वाडका निर्देशक नीलेश सहायले रिंजिंग माथि निकै ठूलो भरोसा राखेका छन् । उनले आगामी दिनमा बलिउडको सबैभन्दा चर्चित एक्सन स्टार रिंजिंग हुने दावी गरेका छन् । रिंजिंग हलिउड स्टार ड्वेन जोहन्सनको भारतीय रुप हुने पनि उनले बताएका छन् ।