बालकृष्ण ढुंगेललाई माफी दिने सरकारको निर्णय आज सर्वोच्चमा पेश हुने

काठमाडौं, १५ जेठ- सर्वोच्च अदालतको आदेश अनुसार आज सरकारले बालकृष्ण ढुंगेललाई माफी दिने भन्ने विषयको फाइल सर्वोच्चमा पेश हुँदैछ । सर्वोच्चले पूर्व माओवादी नेता बालकृष्ण ढुंगेललाई सरकारले कैद माफी दिने विषयको फाइल आज मंगलबार पेश गर्न आदेश गरेको छ। आज सरकारले गरेको निर्णयको फाइल सर्वोच्चमा पेश भएपछि ढुंगेलेको विषयमा के हुन्छ भन्ने निकै चासोका साथ हरिएको छ ।

हिजो सोमबार दुवै पक्षको सुनुवाई नसकिएको भन्दै सरकारले गरेको निर्णयको फाइल मागेको हो । न्यायाधीशद्वय मीरा खड्का र टंकबहादुर मोक्तानको संयुक्त इजलासले सक्कल फाइल पेश गर्न आदेश गरेको हो। समय अभावका कारण दुवै पक्षको बहस नसकिएको भन्दै सर्वोच्चले मंगलबार निर्णय सुनाउने भएको छ।

‘अन्तरिम आदेश छलफलका लागि पेश हुन आएको रिट निवेदनमा समय अभावले बहस नटुंगिएकाले छलफलका लागि भोलि जेठ १५ गते पेश गर्नु’ सर्वोच्चले सोमबार जारी गरेको आदेशमा भनिएको छ, ‘बालकृष्ण ढुंगेललाई सजाय मिनाहा सम्बन्धी सक्कल फाइल इजलास समक्ष देखाइ फिर्ता लैजाने गरी महान्यायाधीवक्ताको कार्यालय मार्फत झिकाउनु होला।’

आज गणतन्त्र दिवसको अवसरमा सरकारले माफी दिन लागेको बताइएको छ । सर्वोच्चले जन्मकैदको सजाय भोगिरहेका ढुंगेललाई माफी दिने तयारी गरिरहेको सरकारी कदमका विरुद्धमा सर्वोच्च अदालतमा बिहीबार बरिष्ठ अधिवक्ता दिनेश त्रिपाठीले रिट दर्ता गरेका थिए।