बुनपाका वडाहरुमा अरुलाई पछार्दै लगातार एमाले प्यानलको जीत

काठमाडौको बूढानीलकण्ठ नगरपालिकामा मतगणना भईसकेका वडाहरुमा लगातार एमालेको प्यानलले नै जीत हासिल गरेको छ । नेकपा एमालेका तर्फबाट बूढानीलकण्ठ वडा नं. १३ मा वडा अध्यक्षका उम्मेदवार श्रीकृष्ण श्रेष्ठको सम्पुर्ण प्यानल, वडा नं. १२ बाट वडा अध्यक्ष उम्मेदवार शम्भु भट्टराईको सिङ्गाो प्यानल, वडा नं. ११ बाट वडा अध्यक्षका उम्मेदवार राजु अधिकारी सहित सिङ्गाो प्यानल नै विजयी भईसकेको छ । त्यस्तै बूनपा १० बाट नवराज भट्टराइको प्यानल र वडा नं. ९ बाट राजेन्द्र प्रसाद सापकोटाको सबै प्यानलले नै जीत हासिल गरेको छ । वडा नं. ८ मा पनि एमालेका तर्फबाट वडा अध्यक्ष उम्मेदवार सुमन तामाङको टोली नै अगाडी रहेको छ ।

अहिलेसम्मको मतगणनाअनुसार मेयर पदमा एमालेका उद्धव खरेल नेपाली कांग्रेसका राजु अधिकारी र माओवादी केन्द्रका रविन अधिकारीभन्दा धेरै अगाडी रहेका छन् । त्यस्तै उपमेयरमा रमा राई पनि अन्य पाटी भन्दा धेरै अगाडी रहेकी छिन् ।यसैअनुरुप जाने हो भने बूढानीलकण्ठ नगरपालिकाको मेयर पदमा उद्धव खरेल र उपमेयरमा रमा राईको जीत सुनिश्चित रहेको नेकपा एमाले बूढानीलकण्ठ नगर संगठन कमिटीका संयोजक दीपक निरौलाले बताउनुभयो ।

यो क्षेत्र कांग्रेस नेता तथा स्वास्थ्यमन्त्री गगन थापाको पकट रहेको क्षेत्र पनि हो । अहिले बूढानीलकण्ठ नगरपालिका एमालेमय बनेको र सबै वडाहरुमा एमालेले नै जित्ने पक्का रहेको निर्वाचन परिचालन कमिटीका संयोजक सुन्दर पुर्कुटी बताउँछन् ।