भारतीय महिला बक्सर मेरी कोमको अर्को कीर्तिमान

३५ बर्षीया । तीन सन्तानकी आमा । यस्तो अवस्थामा बक्सिङ रिङमा उत्रनुनै प्रायले खतरनाक ठान्छन् । तर, विश्व प्रख्यात भारतीय महिला बक्सर मेरी कोमले फेरी एक पटक आफूलाई अब्बल सावित गर्दै विश्वलाई चकित पारेकी छन् । उनले बक्सिङ रिङमा नयाँ विश्व किर्तिमान समेत बनाएकी छन् ।

३५ बर्षीया कोमले नयाँ दिल्लीमा जारी विश्व बक्सिङ च्याम्पियनसिपमा स्वर्ण जित्दै नयाँ किर्तिमान बनाएकी हुन् । कोमले आइतबार भएको ४५–४८ केजीतर्फको फाइनलमा युक्रेनकी हेना ओखोटालाई ५–० अंकले स्तब्ध बनाउँदै सिंगो भारतलाई खुशी तुल्याईन् ।

कोम ६ पटक महिला बक्सिङ प्रतियागितामा स्वर्ण जित्ने पहिलो खेलाडीको किर्तिमान रचिन् । यसअघि उक्त किर्तिमान कोम र आयरल्याण्डकी केट टेलरको नाममा थियो । दुवैले समान ५–५ स्वर्ण पदक जितेका थिए । कोमले यसअघि सन् २००२, २००५, २००६, २००८, २०१० को विश्व च्याम्पियनसिपका स्वर्ण जितेकी थिईन् । सन् २००१ मा भने कोमले रजत पदकमा चित्त बुझाएकी थिईन् । एजेन्सी