भैली खेल्ने क्रममा गाडी रोक्दा एक महिलाको ज्यान गयाे !

सल्यान, २१ कात्तिक । सल्यानका महिलाहरूले भैली खेल्ने क्रममा गाडी रोक्दा एक महिलाको ज्यान गएको छ भने एक महिला गम्भीर घाइते भएकी छन् । सल्यान बागचौर नगरपालिका १२ का महिलाहरू भैली खेल्न रुकुम झुल्नेटामा पुगेर गाडी रोक्ने क्रममा दुर्घटना भएको हो । मंगलबार दिउँसो २ बजेतिर सल्यानबाट रुकुम खलंगा तर्फ हिडेको भे १ ज १००० नम्बरको जिपलाई देउसी भैलो खेल्ने महिलाहरुले रोक्न खोज्दा जिप नरोकिएपछि बानपा १२ निवासी ३८ बर्षिय कल्पना ओलीलाई किचेर उनको ज्यान गएको हो ।

घटनामा सोही वडाकी २८ बर्षिय दुर्गा केसी गम्भीर घाइते भएकी छन् । उनको उपचारका लागि नेपालगन्ज लगिएको जिल्ला प्रहरी कार्यालय पश्चिम रुकुमका संचार प्रमुख गणेश साउथले लेकाली अनलाइनलाई जानकारी दिए । जिप र जिप चालक प्रहरीको नियन्त्रणमा रहेको र मृतकलाई पोष्टमार्टमका लागि जिल्ला अस्पताल पश्चिम रुकुममा राखिएको प्रहरीले जनाएको छ ।