मलाई माननीय नभन्नुहोला : महेश बस्नेत

भक्तपुर, पुस २० । भक्तपुरको गुण्डु नवनिर्वाचित प्रतिनिधिसभा सदस्य महेश बस्नेतको जन्मथलो हो । बस्नेतको जन्मथलो गुण्डुमा आज नवनिर्वाचित प्रतिनिधिसभा र प्रदेशसभाका सदस्यहरुलाई बधाई कार्यक्रम थियो । कार्यक्रममा ठूलो जमघट थियो ।

कार्यक्रममा नवनिर्वाचित प्रतिनिधिसभा सदस्य महेश बस्नेत आफूसँगै निर्वाचित प्रदेशसभाका सदस्यहरू सशिजंग थापा र राजेन्द्रमान श्रेष्ठसहित पुगेका थिए ।

आसनग्रहणको सिलसिलामा सबैलाई माननीय भनेर सम्बोधन गरिएको थियो । तर, बोल्ने क्रममा बस्नेतले भने, ‘मलाई माननीय नभन्नु, किनकि म भक्तपुरको भाई, दाई, छोराभतिजाको सम्बोधनमै आनन्द महसुस गर्दछु । नेता कार्यकर्ताले कमरेड नै भनुहोस् त्यसमा आत्मीयता हुन्छ ।’

‘अब गुण्डु विकासको तेर्सो चैथो लाइनमा बस्नुपर्दछ । हिजो म पराजित हुँदा गुण्डुलाई पहिलो पंक्तिमा राखेर विकास गर्न पहल गरे,’ बस्नेतले भने ।

उनले यो क्षेत्रमा स्याट्लाइट सिटी, प्राणी उद्द्यान केन्द्र, सडक विस्तारलगायतको काम धमाधम भैरहेको छ । अब निर्वाचित भएपछि सिङ्गो भक्तपुर मेरो प्राथमिकतामा पार्नुपर्ने बताए ।

‘व्यक्तिगत लाभ कतै आउने भए मेरा आफन्त र छिमेकिले पछिल्लो लाइनमा बसेर लिनुपर्दछ । त्यो नै मेरो लागि सच्चा बधाई र शुभकामना हुनेछ,’ बस्नेतले भने ।