मुख्यमन्त्री शाही बेल्चा लिएर फोहर सोहर्न निस्किएपछि…

सुर्खेत, ९ भदौ । कर्णाली प्रदेश सरकारका मुख्यमन्त्री महेन्द्रबहादुर शाही शनिवार बिहानै बेल्चा लिएर सडकमा निस्किए । टिसर्ट, ट्राउजर र स्पोर्ट जुत्तामा २ जना अंगरक्षकसहित हातमा बेल्चा बोकेका मुख्यमन्त्री शाही वीरेन्द्रनगरको घण्टाघर चोकमा पुगेका हुन् ।

नेपाल मानव धर्म सेवा समिति सुर्खेतको टोली घण्टाघरमा मुख्यमन्त्री शाहीलाई स्वागतका लागि तयारी अवस्थामा थियो । मुख्यमन्त्री शाहीलाई मानव धर्म सेवा समितिको टोलीले स्वागत गर्दा प्रदेश सरकारकी प्रवक्ता तथा भूमि व्यवस्था एवं कृषि सहकारी मन्त्री विमला केसी र बीरेन्द्रनगर नगरपालिकाका मेयर देवकुमार सुवेदी पनि सोही ठाउँमा आइपुगेका थिए ।

मानव धर्म सेवा समितिद्वारा राखिएको नगर सरसफाई कार्यक्रमका बारेमा छोटो मन्तव्य राखिसकेपछि मुख्यमन्त्री शाही आफै सडक छेउँछाउँमा रहेको फोहोरको थुप्रोमा बेल्चा चलाउन शुरु गरे । मुख्यमन्त्रीलाई साथ दिँदै प्रवक्ता विमला केसी र नगरप्रमुख देवकुमार सुवेदी पनि फोहोरको थुप्रो सफा गर्न थाले । फुर्तिलो र छिटोछरितो ज्यान भएका शाहीले पसिना चुहिने गरी बेल्चा चलाउँदै नगरको सरसफाईका लागि नगरवासी नै सक्रिय हुनुपर्ने धारणा राखे ।

वीरेन्द्रनगरलाई कर्णाली प्रदेशकै सफा र पर्यटकीय नगरी निर्माण गर्नुपर्ने उनको भनाई छ । सरसफाई गर्दै गर्दा मुख्यमन्त्री शाही र उनको टोली यस्तो देखियो ।