मोदी भ्रमण-होटल र लजमा समेत निगरानी राख्न निर्देशन

अश्विन खड्का, २२ वैशाख- भारतीय प्रधानमन्त्री नरेन्द्र मोदीको आसन्न जनकपुरर भ्रमणलाई लिएर चारै तहको सुरक्षा निकाय सक्रिय हुन निर्देशन भएको छ । प्रदेश नम्बर २ को सरकारले आठवटै जिल्लाको सीमा क्षेत्रमा सतर्क भएर बस्न सुरक्षा निकायलाई निर्देशन दिएको हो ।

प्रदेश २ का आन्तरिक मामिला तथा कानूनमन्त्री ज्ञानेन्द्र यादवका अनुसार होटल र लजमा निगरानी राख्नुपर्नेछ । भारतबाट नेपाल आउने र नेपालबाट जाने यात्रु र सवारी साधनलाई निगरानी गरी सुरक्षा व्यवस्था कडा पार्न निर्देशन भएको हो । छलफलमा भारतीय सुरक्षा अधिकारीहरूको समेत सहभागिता रहेको मन्त्री यादवले बताए ।

भारतीय प्रधानमन्त्री मोदीको भ्रमणका क्रममा कुनै पनि अवाञ्छित क्रियाकलाप नहोस् भन्दै सुरक्षा निकायलाई कडा निर्देशन दिइएको मन्त्री यादवले जानकारी दिए । सुरक्षाको लागि सबै तहका सुरक्षा निकायका प्रमुख तथा मातहतका सुरक्षा निकाय सतर्क हुन निर्देशन दिइएको छ ।