युवाले राजनीतिक आन्दोलन होइन, समाज सुधार गर : प्रधानमन्त्री

काठमाडौं । प्रधानमन्त्री केपी शर्मा ओलीले विद्वानहरुको देश बनाउनुपर्ने बताएका छन् ।
विद्यालय भर्ना अभियानमा नेकपा निकट युवा र विद्यार्र्थीहरुसँगको अन्तरक्रियामा बुधबार प्रधानमन्त्री ओलीले नेपाललाई निरक्षरहरुको होइन, विद्वानहरुको देशको रुपमा पहिचान बनाउनु पर्ने बताए ।

प्रधानमन्त्री ओलीले युवा, विद्यार्थीले सृजनशील समाज सुधारको काममा लाग्नका लागि कुनै अवरोध नरहेको स्पष्ट पारे । प्रधानमन्त्री ओलीले अहिले आन्दोलनको स्वरुप फेरिएको स्पष्ट पार्नुभएको छ । “अब राजनीतिक संघर्ष र आन्दोलन गर्नुपर्ने दिन सकिएका छन् ” प्रम ओलीले भने, “अब युवाहरुले समाज सुधारका लागि शिक्षा, स्वास्थ्य, श्रम, सीप र उत्पादन जस्ता कुरामा ध्यान दिनुपर्दछ ।”

“हाम्रा विद्वान पुर्खाको जेनेटिक मेमोरीको उपायोग हामीले गर्नुपर्दछ । विद्वान पुर्खाका सन्तान हामी केही समय निरक्षर रह्यौं तर अब यो अवस्था रहिरहन सक्दैन ।”

प्रधानमन्त्री ओलीले बालबालिका विद्यालय भर्नाका लागि अभिभावक सचेतना सञ्चालन गर्नुपर्ने बताएका छन् । “शिक्षाको महत्व अभिभावकलाई बुझाउनुपर्दछ” प्रम ओलीले भने, “त्यसपछि मात्र उनीहरुलाई छोराछोरी पढ्न पठाउँछन् ।”

गतवर्षदेखि बिशेष रुपले सुरु गरिएको विद्यार्थी भर्ना अभियानलाई घरघरमै गएर सञ्चालन गर्न प्रधानमन्त्री ओलीले विद्यार्थी र युवाहरुलाई आग्रह गरेका छन् ।

अन्तरक्रिया कार्यक्रमलाई शिक्षा, विज्ञान तथा प्रविधि मन्त्री गिरिराजमणि पोख्रेलले सहजिकरण गरेका थिए ।