राजपाका नेताद्वय के गर्दैछन् दिल्लीमा ?

काठमाडौं, २ वैशाख । प्रधानमन्त्री केपी ओली भारतबाट फर्किएको भोलिपल्टै राष्ट्रिय जनता पार्टीका अध्यक्ष महन्थ ठाकुर नयाँ दिल्ली प्रस्थान गरे । ठाकुर गएको दुई दिनपछि अर्का राजपा नेता महेन्द्र राय यादव पनि भारत गए ।

प्रधानमन्त्री ओलीसँगको भेटवार्तामा भारतीय प्रधानमन्त्री नरेन्द्र मोदीले संविधान संशोधनलगायत नेपालको राजनीतिबारे कुनै कुरा उल्लेख नगरेकाले धेरैले ठाकुर र यादवको दिल्ली भ्रमणलाई चासो दिए । उनीहरू दिल्लीमा भारतीय संस्थापन पक्षसँग नेपालको संविधान संशोधनबारे दबाब दिन गएको भनेर पनि विश्लेषण गरे । तर, ठाकुर र यादव आफ्नै स्वास्थ्य उपचार गराउन नयाँ दिल्ली गएका हुन् भन्ने कुरा कमैलाई मात्र थाहा छ ।

राजपा संयोजक ठाकुर मुटुरोगी हुन् । उनी केही समयदेखि अस्वस्थ थिए । उनको मुटुमा पेसमेकर जडान भएको छ । नेता यादव पनि मुटुरोगी हुन् । दुवै नेताको अहिले नयाँ दिल्लीको मेदान्त अस्पतालमा फ्लोअप उपचार भइरहेको राजपाका एक नेताले बताए । दुवै नेता वैशाखको पहिलो साताभित्र नेपाल आउने भएका छन् ।

वैशाख ७ गते राजपाको स्थापना दिवस हो । स्थापना दिवस मनाउनकै लागि दुवै नेता चाँडै आउने भएका छन् । राजपाले अहिलेसम्म संसदीय दलको नेता चयन गर्न सकेको छैन । सम्भवतः वैशाख ८ गते बस्ने राजपा राजनीतिक समितिको बैठकले दलको नेता चयनबारे छलफल गर्ने राजपाका नेताहरूको भनाइ छ ।