राष्ट्रिय ख्रीष्टियन महासंघको राष्ट्रिय भेला शुरु

सुर्खेत, १८ वैशाख, कर्णाली प्रदेशको राजधानी वीरेन्द्रनगर, सुर्खेतमा राष्ट्रिय ख्रीष्टियन महासंघ नेपालको १० औँ राष्ट्रिय भेला शुरु भएको छ ।

वैशाख १९ गतेसम्म हुने राष्ट्रिय भेलाको उद्घाटन सोमबार महासंघ कर्णाली प्रदेशका प्रमुख पदम गैरे र केन्द्रीय अध्यक्ष सिबी गहतराजले संयुक्तरुपमा गर्नुभयो । उद्घाटन कार्यक्रममा बोल्दै अध्यक्ष गहतराजले ख्रीष्टियनको कार्यक्रममा कर्णाली प्रदेश सरकारले बेवास्ता गरेको भन्दै प्रधानमन्त्रीले समेत युरोपियन युनियनको नाममा इसाईमाथि अपमान गरेको आरोप लगाउनुभयो ।

“नक्कली क्रिश्चियनको झुण्डले सच्चा क्रिश्चियनको बदनाम गरिरहेका छन् र यसमा पनि ठूलो षडयन्त्र भइरहेको छ,” अध्यक्ष गहतराजले भन्नुभयो । पछिल्लो समयमा सरकारका गृहमन्त्री नै क्रिश्चियनप्रति निर्मम भएर लागेको आरोप लगाउनुभयो ।

उहाँले सरकारको क्रिश्चियन दबाउने नीतिले आफूलाई झनै बलियो बनाएको तर्क गर्नुभयो । धर्मनिरपेक्ष राष्ट्रमा सरकारको अन्यायपूर्ण व्यवहारले नेपालका ३० लाख क्रिश्चियनलाई समस्या पार्न खोजिएको तर संविधानमा व्यवस्था भएको मौलिक हक अन्तर्गतका धाराबाट सरकारलाई गलाएरै छाड्ने चेतावनी दिनुभयो ।

महासंघका उपमहासचिव सागर बैजुले सरकारले क्रिश्चियनलाई तनाव दिएर मानसिक रोगका बिरामी बनाएको दोषारोपण गर्नुभयो । उहाँले धार्मिक अल्पसंख्यकले सुरक्षित रुपले बाँच्न सक्ने अवस्था नभए बहुसंख्यकले पनि शान्तिसाथ बाँच्न नसक्ने बताउनुभयो ।

उहाँले इसाईहरु धर्म परिवर्तन नभई मानव जीवन परिवर्तनार्थ निरन्तर लागि परेको दाबी गर्दै वर्तमान सरकारलाई आस्तिकदेखि होइन, नास्तिकबाट सजग रहन सुझाउनुभयो ।

उद्घाटन कार्यक्रममा ख्रीष्टियन महासंघ कर्णाली प्रदेश प्रमुख पदम गैरेले क्रिश्चियन समुदायको अस्तित्व, पहिचान, हित र उन्नतिका लागि जन्मेको यो संस्थाले राष्ट्रको समृद्धि एवं विकासमा पनि सघाउ पु¥याउँदै आएको बताउनुभयो ।

उहाँले कार्यक्रममा सम्मानका साथ बोलाउँदा पनि सरकारबाट कुनै प्रतिउत्तर नआएको गुनासो गर्दै मुलुकमा इसाईहरुले पनि नीतिगत तहमा पुग्ने नेतृत्व जन्माउनुपर्नेमा जोड दिनुभयो ।

महासंघका महिला विभाग प्रमुख डोमा राईले समाजले दुत्कारेको महिला वर्गले यो क्षेत्रमा न्याय पाएको बताउनुभयो । उहाँले इसाई समुदायमा महिलाको बढी सम्मान हुने गरेको र पीडामा परेका महिलालाई समेटेर लैजान र महिला सशक्तीकरणका सवालमा विभिन्न प्रशिक्षण सञ्चालन गर्ने जनाउनुभयो ।

कार्यक्रममा प्रदेश नं ७ का प्रमुख जीतेन्द्र ताम्राकार, प्रदेश नं ५ का टेकविक्रम हिन्ताङ्, प्रदेश नं ४ का राजु परियार, प्रदेश नं ३ का ज्ञानबहादुर सुनुवार, प्रदेश नं २ का प्रदीप मरवैता यादव र प्रदेश नं १ का सचिव डिल्लीराम पौडेलीसहितले सरकारले सदाचार नीति ल्याएर दबाउन खोजेको आरोप लगाउनुभएको थियो ।

कार्यक्रमका अधिकांश वक्ताले सरकारले इसाईलाई दबाउन खोजे नेपालको संविधानको मौलिक हकमा व्यवस्था गरिएको धारा २६ को धार्मिक स्वतन्त्रताको हकको आधारमा अघि बढ्ने चुनौती दिएका थिए । उक्त भेलामा केन्द्रीय पदाधिकारी, मुलुकभरिका उच्च पदस्थ ख्रीष्टियन रेभ, पाष्टर, एल्डर, डिकन र विश्वासीको सहभागिता रहेको छ ।