राष्ट्रिय सभामा लान प्रधानमन्त्री ओलीले नमानेपछि वामदेवको नयाँ अस्त्र
सारांश
- काठमाडौं, १८ फागुन ।
- प्रधानमन्त्री केपी शर्मा ओलीले सोमबार बस्नुपर्ने नियमित क्याबिनेट आइतबार साँझ डाके ।
- मृगौला प्रत्यारोपणका लागि सोमबार अस्पताल भर्ना हुनुपर्ने भन्दै उनले क्याबिनेट डाकेर महत्वपूर्ण निर्णयहरु गरे तर पार्टीले गरेको एउटा निर्णय कार्यान्वयन गरेनन् ।
काठमाडौं, १८ फागुन । प्रधानमन्त्री केपी शर्मा ओलीले सोमबार बस्नुपर्ने नियमित क्याबिनेट आइतबार साँझ डाके । मृगौला प्रत्यारोपणका लागि सोमबार अस्पताल भर्ना हुनुपर्ने भन्दै उनले क्याबिनेट डाकेर महत्वपूर्ण निर्णयहरु गरे तर पार्टीले गरेको एउटा निर्णय कार्यान्वयन गरेनन् । नेकपा सचिवालयको त्यो निर्णय थियो उपाध्यक्ष वामदेव गौतमलाई राष्ट्रियसभा सदस्यमा मनोनितका लागि राष्ट्रपतिसमक्ष सरकारले सिफारिश गर्ने ।
ओली अर्थमन्त्री डा. युवराज खतिवडालाई मनोनित गर्न चाहन्छन् । तर, पार्टीले उनलाई बाँधिदिएको छ । त्यसपछि ओलीले कसैका बारेमा पनि हिजो निर्णय लिएनन् । खतिवडाको राष्ट्रिय सदस्य पद मंगलबारबाट सकिदैछ । २१ फागुनबाट नयाँ सदस्यहरुले सपथ लिनेछन् । तर, मनोनित सदस्यको पद खाली नै हुने अवस्था बनेको छ । ओली आज अस्पताल भर्ना हुने भएकाले मनोनितको टुंगो लाग्न समय लाग्ने देखिइसकेको छ । यसको अर्थ अब वामदेव रोकिन पनि सक्छन् ।
ओलीको अस्पताल भर्नाले वामदेवको विषय पनि ओझेलमा पर्दै जाने देखिएको छ । यसले केही समयका लागि भएपनि नेकपा विवाद साम्य भएको छ । तर, वामदेव चुप लागेर नबस्ने बुझिएको छ । ओलीले लिंगरिंग गर्नथालेको भन्दै कडा रुपमा प्रस्तुत हुने रणनीति बनाएका छन् ।
ओलीले नेकपा सचिवालयको निर्णयलाई समेत चुनौती दिइसकेका छन् । यसबाट उनी पार्टीमा निकै प्रभावशाली रहेको र आफ्नो निर्णयमा चल्न सक्ने सन्देश प्रवाह गरेका छन् । उता सचिवालयको निर्णय ओलीले नमानेमा गम्भीर परिणाम भोग्नुपर्ने चेतावनी केही नेताहरुबाट आइरहेको छ । वामदेवले यो बीच कुनै न कुनै अस्त्र तयार गर्ने विश्वस्त स्रोतले जनाएको छ । त्यो अस्त्रले नेकपाभित्र र बाहिरको राजनीतिमा समेत दुरगामी असर गर्ने बुझिएको छ ।
प्रतिक्रिया