लमजुङ प्रहरीद्धारा १७ किलो सुनसहित एक युवक पक्राउ

लमजुङ प्रहरीले अनुमानित १७ किलो सुन सहित एक युवकलाई पक्राउ गरेको छ । हिमाली जिल्ला मनाङबाट सुनलाई झोलामा लिएर मोटरसाइकलमार्फत झर्दै गरेका एक युवकलाई लमजुङ प्रहरीले पक्राउ गरेको हो । डिउटीमा खटिएका प्रहरीले मस्र्याङ्दी गाउँपालिकाको खुदीबाट ती युवकलाई बिहान पौने ११ बजेतिर सुनसहित पक्राउ गरेको हो ।

मोटरसाइकलमा आउँदै गरेका ती युवकलाई प्रहरीले चेकिङका क्रममा रोकेपछि मोटरसाइकल छोडेर भागेका थिए । ती युवालाई भाग्दै गर्दा खुदी बजार क्षेत्रबाट पक्राउ गरेको ट्राफिक प्रहरी जवान पूर्ण विकले बताए ।

प्रहरी नायव उपरिक्षक पदमबहादुर विष्टका अनुसार १७ थान सुन समातिएको हो । युवकले पनि सुन नै रहेको भनी बताएको र सामान्यतय एक थानमा एक किलो हुने गरेकाले अनुमानित १७ किलो होला भन्ने लागेको डिएसपी विष्टले जानकारी दिए । प्रहरीले विस्तृत विवरण भने बताएको छैन ।

प्रहरीका अनुसार मनाङको नासोङ गाउँपालिका–९, दानाक्युका ३१ वर्षीय पासाङ गुरुङ भन्ने युवकलाई पक्राउ गरिएको छ । उनले सुन बोक्न प्रयोग गरेको बा ५८ प ४२९१ नं. को टु टवान्टी पल्सर मोटरसाइकल समेत समातिएको डिएसपी विष्टले बताए । खुदीमा सुनसहित युवक समातिएपछि उनी खुदी पुगेका थिए ।

खुदी सदरमुकाम बेंसीसहरबाट करीब ७ किलोमीटर उत्तरतर्फ मनाङ जाने बाटोमा पर्छ । सुनलाई तिब्बतको सीमाबाट मनाङ हुँदै ल्याइएको हुनसक्ने अनुमान गरिएको छ ।