लेखापढी व्यवसायीका नक्कली काम

सप्तरी । सरकारी कामका लागि नक्कली छाप बनाएर कीर्ते गरी कागजात तयार गर्ने एकजना लेखापढी व्यवसायीलाई प्रहरीले पक्रेको छ ।

सप्तरीको कञ्चनरुप नगरपालिका–११, गोरपारका ३१ वर्षीय मोहम्मद सल्लम शेखलाई पक्राउ गरिएको प्रहरीले जानकारी दिएको छ । मालपोत कार्यालयको छाप घरमै राखेर विभिन्न किसिमका सरकारी कागजपत्र कीर्ते काम गरिरहेको बेला उनलाई पक्राउ गरिएको इलाका प्रहरी कार्यालय कञ्चनरुपले जनाएको छ ।

प्रहरीका अनुसार घर खानतलासी गर्दा विभिन्न व्यक्तिका नेपाली नागरिकताको प्रमाणपत्र, नागरिकताका प्रतिलिपि, सक्कल जन्मदर्ता प्रमाणपत्र, जग्गाधनी दर्ता प्रमाणपत्र, जग्गा रजिस्ट्रेसन लिखत कागज, मतदाता नामावली र फोटो सहितको परिचयपत्र, नागरिकताको अनुसूची फारम, विवाहदर्ताको प्रमाणपत्र, मृत्युदर्ताको प्रमाणपत्र, बसाइँसराइ दर्ताको प्रमाणपत्रलगायत प्याडहरु बरामद गरिएको छ ।