वायुसेवा निगम डुबाउन खोज्नेलाई सरकारले छोड्दैन : परराष्ट्रमन्त्री ज्ञवाली

नेपाल वायुसेवा निगमको दुर्गति २०४८ सालदेखि भएको परराष्ट्रमन्त्री प्रदीप ज्ञवालीले बताए । निगमसँग भएका जहाज विभिन्न बहानामा बेच्ने वा भाडा लगाउने, नयाँ जहाज किन्न लाग्दा अनेक बखेडा झिक्ने र घण्टाको दरमा डलरमा जहाज भाडामा ल्याउने परिपाटीले निगम अहिलेको अवस्थामा पुगेको मन्त्री ज्ञवालीको भनाई छ । मंगलबार काठमाडौँमा नेपाल वायुसेवा निगम कर्मचारी युनियनको चुनावी सभामा बोल्दै उनले आफु २०६३ सालमा पर्यटनमन्त्री बन्दा यस्तो प्रवृत्तिलाई ब्रेक लगाएको दावी गरे ।

चुनावी सभालाई सम्बोधन गर्ने क्रममा परराष्ट्रमन्त्री ज्ञवालीले निगम जहाज विहिन बन्न नहुने तर्क राखे । जहाज नै नभए निगमको अस्तित्व नै नरहने भन्दै विभिन्न बहानामा निगमलाई जहाज विहिन बनाउन खोज्ने वा भएका जहाजलाई उड्न नदिने जोकोहीको चलखेललाई सरकारले निस्तेज पार्ने समेत उनले बताए ।

निगम डुबाउने षडयन्त्र भइरहेको दावी गर्दै मन्त्री ज्ञवालीले व्यवस्थापन समिति, सञ्चालक समिति र कर्मचारी युनियनलाई यसप्रति सचेत रहन आग्रह समेत गरे । पछिल्लो समय जहाज खरिदमा अनियमितता भएको भन्ने प्रसंगमा उनले यसलाई संसदीय समिति वा संसदका विभिन्न निकायले अनुसन्धान गरिरहेको र चाँडै नै सत्यतथ्य पत्ता लगाउने दावी गरे ।

कार्यक्रममा बोल्दै उनले निगमको निजिकरण कुनै हालतमा हुन नसक्ने जिकिर गरे । राज्य सञ्चालनका केही निश्चित दायराभित्र कतिपय निकाय राज्यको कमाण्डमा हुनुपर्छ भन्दै मन्त्री ज्ञवालीले राष्ट्रिय झण्डावाहक वायुसेवा निगम पनि राज्यको महत्वपुर्ण निकाय भएकाले यो राज्यकै कमाण्ड अन्र्तगत हुने बताए । निगम निजिकरण गर्नुपर्छ भन्दै केही तत्व भ्रम सिर्जना गर्न लागिपरेको दावी गर्दै उनले त्यसो नगर्न चेतावनी दिए ।

निगमका सञ्चालक तथा व्यवस्थापन समितिलाई नयाँ नयाँ गन्तव्यको खोजी गर्न आग्रह गर्दै मन्त्री ज्ञवालीले युरोपले लगाएको प्रतिबन्ध हटाउन आफुले प्रयास गरिरहेको बताए । मन्त्री ज्ञवाली ‘भन्छन् हामीलाई जहाज बेच्ने र हाम्रा पाइलटलाई तालिम दिनेले नै प्रतिबन्ध लगाउन अनुचित छ ।’