विप्लव उपस्थित थिए काठमाडौँको विशेष कार्यक्रममा !

काठमाडौँ, ११ मंसिर।  नेत्रविक्रम चन्द्र विप्लव नेतृत्वको नेपाल कम्युनिष्ट पार्टीले गएको शनिबार (मंसिर ८ गते) काठमाडौँमा विशेष कार्यक्रम गरेर पार्टी पुनर्गठनको पाँचौँ वर्षगाठ मनायो । प्रदर्शनी मार्गमा भव्य र्‍यालीसहित भएको विशेष कार्यक्रममा पार्टीका अध्यक्ष विप्लव नै आउने चर्चा थियो । तर उनी मञ्चमा देखिएनन् । प्रवक्ता तथा स्थायी कमिटि सदस्य खड्गबहादुर विश्वकर्मा प्रकाण्डसहितका नेताले सभालाई सम्बोधन गरे ।

घटनाको चार दिनपछि पार्टीका अध्यक्ष विप्लव सो कार्यक्रममा उपस्थित रहेको भन्ने दाबीसहित सामाजिक सञ्जालमार्फत तस्बिर सार्वजनिक भएको छ । विप्लव मञ्चमा नभई सामान्य व्यक्तिको रुपमा दर्शकदीर्घामा बसेको दाबी उनको पार्टीका केही उच्च नेताले दाबी गरेका छन् । यद्यपि त्यसबारे आधिकारिक धारणा आउन सकेको छैन ।

विप्लव नेतृत्वको नेपाल कम्युनिष्ट पार्टीका एक जिल्ला सेक्रेटरीले भने, ‘शनिबारको कार्यक्रममा अध्यक्ष (विप्लव) कार्यक्रममा उपस्थित हुनुहुन्थ्यो । उहाँसहित अरु केही केन्द्रीय नेताहरु दर्शकदीर्घामा बस्नु भएको थियो । यो योजनाबद्ध रुपमा भएको हो । हाम्रो रणनीति नै मञ्चमा अध्यक्षबाहेकका केही नेता मात्रै उपस्थित हुने थियो ।’ उता सुरक्षा स्रोतले विप्लव मंसिर ८ गते शनिबार काठमाडौँमै रहेको सूचना प्राप्त भएको तर उनी प्रदर्शनी मार्गको कार्यक्रममा उपस्थित भए–नभएको बारे जानकारी नरहेको बतायो ।स्रोतले भन्यो, ‘विप्लव ८ मंसिरमा काठमाडौँ मै रहेको र ९ गते काठमाडौँ बाहिर (मकवानपुर) गएको भन्ने सूचना पाएका हौँ ।’ तर विप्लव नेतृत्वको पार्टीका नेताले भने उनका अध्यक्ष मंसिर १० गते अर्थात सोमबार काठमाडौँबाट बाहिर गएको बताए ।

कार्यक्रममा उपस्थित भएको भनेर सार्वजनिक भएको तस्बिरमा विप्लव टाउकोमा ऊनको टोपी तथा मुखमा मास्क लगाएर लौरी टेकेर भिडमा उभिएको देखिएको छ । तर यो तस्बिरको वास्तविकताबारे स्वतन्त्र पुष्टि भने भएको छैन । सुरक्षा स्रोत तस्बिर कसैले ‘फोटोसप’ गरेर बनाएको हुन सक्ने बतायो ।

यता पार्टि निकट मानिने एकजना नेताले भने याे तस्बिर विप्लवकै भएकाे बताएका छन् ।उनले भने तस्बिर त हाे तर अाए नअाएकाे मलाइ थाहा भएन ।