विश्वकपमा छनोटमा अर्जेन्टिनाको झिनो सम्भावना
सारांश
- रियो दी जेनेरियो ।
- दुईपटकको विजेता अर्जेन्टिनाको आगामी विश्वकपमा छनोट हुने सम्भावना कमजोर बनेको छ ।
- दक्षिण अमेरिकी क्षेत्रको शुक्रबार बिहान खेलिएको छनोट खेलमा पेरुसँग घरेलु मैदानमै गोलरहित बराबरीमा रोकिएपछि अर्जेन्टिनाको विश्वकप यात्रा कमजोर बनेको हो ।
रियो दी जेनेरियो । दुईपटकको विजेता अर्जेन्टिनाको आगामी विश्वकपमा छनोट हुने सम्भावना कमजोर बनेको छ । दक्षिण अमेरिकी क्षेत्रको शुक्रबार बिहान खेलिएको छनोट खेलमा पेरुसँग घरेलु मैदानमै गोलरहित बराबरीमा रोकिएपछि अर्जेन्टिनाको विश्वकप यात्रा कमजोर बनेको हो । छनोट चरणमा सहभागी १० वटै टोलीले अब एक÷एक खेलमात्र खेल्न बाँकी रहँदा अर्जेन्टिनाले अन्तिम खेलमा आफ्नो जितसँग अन्य टोलीको नतिजामा समेत भर पर्नुपर्ने स्थिति उत्पन्न भएको छ ।
दक्षिण अमेरिकी क्षेत्रको छनोटमा सहभागी १० वटा टोलीले एकअर्कासँग होम एन्ड अवेका आधारमा राउन्ड रोविन लिग खेल्नुपर्नेछ । त्यसपछि तालिकाको पहिलोदेखि चौथो स्थानसम्म आउने टोली सीधै सन् २०१८ मा रुसमा आयोजना हुने विश्वकपमा छनोट हुनेछन् । तालिकाको पाँचौं स्थानमा आउने टोलीले भने विश्वकपमा छनोट हुन अन्तरमहादेशीय प्ले अफ खेल्नुपर्ने प्रावधान छ ।
दक्षिण अमेरिकी क्षेत्रबाट ब्राजिल भने यसअघि नै विश्वकपमा छनोट भइसकेको छ । सहभागी सबै टोलीले अब एक÷एक खेलमात्र खेल्न बाँकी रहँदा ३८ अंकसहित ब्राजिल पहिलो, २८ अंकसहित उरुग्वे दोस्रो, २६ अंकसहित चिली तेस्रो र समान अंक भएको कोलम्बिया चौथो स्थानमा छन् । २५ अंकसहित पेरु पाँचौं र समान अंक बटुलेको अर्जेन्टिना छैटौं स्थानमा आसीन छन् । २४ अंकसहित पाराग्वे सातौं स्थानमा छ ।
आठौं स्थानमा आसीन इक्वेडर (२० अंक), नवौं स्थानमा आसीन बोलिभिया (१४ अंक) र १०औं स्थानमा आसीन भेनेजुएला (नौ अंक) को भने विश्वकपमा छनोट हुने सम्भावना समाप्त भइसकेको छ । अक्टोबर १० मा हुने अन्तिम चरणको खेलमा ब्राजिलले चिली, अर्जेन्टिनाले इक्वेडर, पाराग्वेले भेनेजुएला, पेरुले कोलम्बिया र उरुग्वेले बोलिभियाको सामना गर्नेछन् ।
सन् १९७८ र सन् १९८६ को विश्वकप विजेता अर्जेन्टिना यसअघि सन् १९७० को विश्वकपमा छनोट हुन सकेको थिएन । विश्वकपमा छनोट हुने सम्भावनालाई कायम राख्न अर्जेन्टिनाले आफ्नो अन्तिम खेल जित्नैपर्ने हुन्छ । कम्तीमा तालिकाको पाँचौं स्थानसम्म आउन सके अर्जेन्टिनाले विश्वकपमा छनोटका लागि न्युजिल्यान्डसँग प्ले अफ खेल्ने अवसर पाउनेछ ।
अर्जेन्टिनाका प्रशिक्षक जोर्गे साम्पाओलीले अर्जेन्टिनाको विश्वकप यात्रा असहज रहे पनि असम्भव भने नभएको बताए । ‘यति बेला हामी निकै अप्ठ्यारो स्थितिमा छौं तर विश्वकपमा छनोट हुने हाम्रो सबै ढोका भने अझै पनि बन्द भइसकेको छैन’, उनले भने । आफ्नो सन्न्यास फिर्ता लिएर राष्ट्रिय टोलीमा फर्किएका बार्सिलोनाका स्टार स्ट्राइकर लियोनल मेसीका लागि पनि रुस विश्वकप गतिलो अवसर हो । उनले हालसम्म राष्ट्रिय टोलीको तर्फबाट कुनै पनि ठूलो प्रतियोगिताको उपाधि जित्न सकेका छैनन् ।
त्यसैले पनि मेसीले यसपटक अर्जेन्टिनालाई विश्वकपमा छनोट गराउन ठूलै प्रयास गर्दै आएका छन् । पेरुविरुद्घको खेलका क्रममा दोस्रो हाफमा मेसीले गरेको एउटा सशक्त प्रहार पोस्टमा लागेको थियो । सन् २०१४ को विश्वकपमा पनि मेसीको टोली अन्तिम समयमा आएर उपाधिबाट चुकेको थियो । त्यति बेला फाइनलमा जर्मनीले अर्जेन्टिनलाई हराएको थियो ।
दक्षिण अमेरिकी क्षेत्रको अन्य छनोट खेलमा बोलिभियाले ब्राजिललाई आफ्नो मैदानमा गोलरहित बराबरीमा रोक्यो भने भेनेजुएलाले पनि घरेलु मैदानमै बलियो प्रतिद्वन्द्वी उरुग्वेलाई गोलरहित बराबरीमै रोक्यो । चिलीले भने घरेलु मैदानमा इक्वेडरलाई २-१ गोलले पराजित गर्यो । पाराग्वेले पनि कोलम्बियालाई उसैको मैदानमा २-१ गोलले पाखा लगायो । चिलीका लागि एडुआर्डो भार्गस र एलेक्सिस सान्चेजले एक÷एक गोल गरे । अर्को विजयी टोली पाराग्वेका लागि भने ओस्कर कार्डोजो र एन्टोनियो सानाब्रियाले एक÷एक गोल गरेका थिए । राडामेल फाल्काओले एक गोल गरे पनि उनको टोली कोलम्बियाले हार टार्न सकेन ।
अन्तिम चरणको खेल
(आगामी बुधबार बिहान)
(१) ब्राजिलविरुद्घ चिली
(२) इक्वेडरविरुद्घ अर्जेन्टिना
(३) पाराग्वेविरुद्घ भेनेजुएला
(४) पेरुविरुद्घ कोलम्बिया
(५) उरुग्वेविरुद्घ बोलिभिया
प्रतिक्रिया