संवैधानिक परिषदको बैठक बस्दै, प्रधानन्यायाधीशमा मिश्र कि राणा ?

काठमाडौं, ७ भदौ । प्रधानन्यायाधीश सिफारिसका लागि आज संवैधानिक परिषदको बैठक बस्दैछ । सर्वोच्चको प्रधानन्यायाधीशका लागि योग्यता पुगेका ओमप्रकाश मिश्र वा चोलेन्द्र शमशेर राणामध्ये कसलाई सिफारिस गर्छ भन्ने कौतुहलको विषय बनेको छ ।

प्रधानन्यायाधीश नियुक्तिका लागि यसअघि परिषदले वरिष्ठतम् न्यायाधीश दीपकराज जोशीको नाम सिफारिस गरेको थियो । तर सर्वोच्च अदालतको इतिहासमै परिषद्ले सिफारिस गरेको नाम संसदीय सुनुवाइ समितिबाट अस्वीकृत भएको थियो । जोशी अस्वीकृत भएसँगै प्रधानन्यायाधीश नियुक्तिका लागि पुनः परिषदले अर्को नाम सिफारिस गर्न लागेको हो ।

परिषद्को बैठक लागि अपरान्ह ४ बजे बैठक बस्ने प्रधानमन्त्रीको सचिवालयले जनाएको छ । सर्वोच्चमा प्रधानन्यायाधीशका लागि योग्यता पुगेका वरिष्ठ न्यायाधीशमा ओमप्रकाश मिश्र र चोलेन्द्रशमशेर राणा छन् । परिषद्ले यी दुईमध्ये एक नाम सिफारिस गर्नुपर्नेछ ।

बैठकले अख्तियार दुरुपयोग अनुसन्धान आयोगको प्रमुख पनि सिफारिस गर्ने तयारी गरेको बताइएको छ । दीप बस्न्यातले अवकाश पाएपछि गत फागुनदेखि अख्तियार कार्यवाहकको भरमा चलिरहेको छ । हाल कार्यवाहकको जिम्मेवारी नवीनकुमार घिमिरेले पाएका छन् । प्रमुख आयुक्तका लागि घिमिरेसहित पूर्वमुख्यसचिव लिलामणि पौडेल, राजेन्द्रकिशोर क्षेत्री, युवराज संग्रौला लगायतका आकांक्षी छन् ।