सभामुख उम्मेदवार महरा, आज मनोनयन दर्ता

काठमाडौं, २५ फागुन – वाम गठबन्धनको तर्फबाट कृष्णबहादुर महरा सभामुखको उम्मेदवार बन्ने पक्का जस्तै भएको छ । माओवादी केन्द्रका भागमा परेको सभामुख पदमा महरालाई अगाडि सार्ने तयारी गरेको छ। एमालेलाई राष्ट्रपति र माओवादीलाई सभामुख हुनेगरी भागबन्डा बाँडिएको थियो । तर, महराको विषयमा आज वैठक बसेर औपचारिक निर्णय हुने माओवादी नेताले बताएका छन् ।

निर्वाचनको कार्यतालिका अनुसार आज सभामुखको लागि उम्मेद्वार मनोनयन दर्ताको कार्यक्रम छ । त्यसैले पनि आज नाम टुंगो लगाउनै पर्ने माओवादीमा वाध्यता छ ।

सभामुखमा पूर्व सभामुख सुवास नेम्बाङलाई जिम्मेवारी दिने विषयमा पनि छलफल चलेको थियो । तर, हिजो सााँझ प्रधामन्त्री केपी ओली र माओवादी पुष्पकमल दाहालबीच प्रधानमन्त्री निवास बालुवाटारमा छलफल भएको थियो। छलफलमा सभामुख माओवादीलाई नै दिन ओली तयार भएको बताइएको छ।

भोलि संसद्मा सभामुखका लागि निर्वाचन गर्ने संघीय संसद्को कार्यसूची छ। आज बिहान १० बजेदेखि १ बजेसम्म सभामुखको उम्मेदवारी मनोनयनको कार्यसूची संघीय संसद् सचिवालयले बनाएको छ।