सरकारविरुद्ध शान्ति समाज ओर्लियो मैदानमा, यस्तो छ भोलिदेखि आन्दोलनको कार्यक्रम

काठमाडौं, २५ असार । नेपाल कम्युनिष्ट पार्टी (नेकपा) नेतृत्वको सरकारले गरेका कतिपय निर्णय र गतिविधिहरुलाई “स्वतन्त्रता विरोधी” र “स्वेच्छाचारी” भन्दै मानवअधिकार तथा शान्ति समाज मैदानमा ओर्लिएको छ । समाजले यही असार २६ गते (भोलि)देखि आन्दोलनका कार्यक्रमहरु सार्वजनिक गरेको छ ।

समाजका सभापति डा. गंगाधर पराजुलीद्वारा जारी विज्ञप्तिमा असार २६ गतेदेखि आन्दोलन शुरु हुने बताइएको छ । असार २६ गते प्रधानमन्त्री कार्यालय सिंहदरबार दक्षिण गेट अगाडि दिउँसो १ बजे धर्ना प्रदर्शन गरिने विज्ञप्तिमा उल्लेख छ । प्रदर्शनमा समाजका संस्थापक सभापति कृष्ण पहाडी लगायत नागरिक अगुवा तथा अधिकारकर्मीहरुको सहभागिता हुने बताइएको छ ।

त्यसैगरी असार ३० गते शनिवार १ बजे प्रधानमन्त्री निवास बालुवाटार ३ नम्बर गेट अगाडि दोस्रो विरोध प्रदर्शन तय गरिएको छ । असार ३२ गते सोमबार दिउँसो १ बजे नयाँ बानेश्वर संसद भवन अगाडि तेस्रो प्रदर्शन गरिने र साउन १ गतेदेखि काठमाडौँ उपत्यकाका विभिन्न स्थानहरुमा निरन्तर नागरिक सभा आयोजना गरिने विज्ञप्तिमा उल्लेख छ । ती नागरिक सभाहरुलाई समाजका संस्थापक सभापति कृष्ण पहाडीसहित नागरिक अगुवाहरुले सम्बोधन गर्ने कार्यक्रम राखिएको विज्ञप्तिमा जनाइएको छ ।

साउन महिनाभर गरिने प्रदर्शनसहित दर्जनौं कार्यक्रमहरुको प्रारुप चाँडै सार्वजनिक हुने विज्ञप्तिमा उल्लेख छ । “नेपाल कम्युनिष्ट पार्टी नेतृत्वको वर्तमान सरकारले आधारभूत स्वतन्त्रता र मानवअधिकार कुण्ठित हुनेगरी कतिपय निर्णय गरेको छ”, विज्ञप्तिमा भनिएको छ, “न्यायिक निर्णयहरुलाई समेत लत्याउँदै आपराधिक चरित्रलाई संरक्षण र प्रोत्साहन गरेको र पछिल्लो चरणमा सरकार हिंसात्मक प्रवृत्तिप्रति नरम र सत्याग्रहीहरुप्रति क्रुर बन्दै गएको अवस्थामा आधारभूत स्वतन्त्रता, मानव अधिकार संरक्षणका लागि शान्ति समाजले यो आन्दोलन प्रक्षेपण गरेको हो ।”