सरकार र डा. गोविन्द केसी पक्षबीचको वार्ता असफल

काठमाडौं, ९ साउन । सरकार र डा. गोविन्द केसीबीच बुधबारको वार्ता विफल भएको छ । बुधबार दिउँसो शुरु भएको वार्ता एक घण्टाका लागि स्थगित गरिए पनि फेरि शुरु भए थियो । दोस्रो चरणमा पनि कुनै टुङ्गो लाग्न नसकेपछि वार्ता विफल भएको हो ।

निर्णायक भनिएको वार्ता असफल भएपछि थप अन्यौल थपिएको छ । डा. केसीको पक्षका वार्ता समितिका सदस्य ओमप्रकाश अर्यालले सरकारी पक्षले विधेयकका विषयमा कुनै निर्णय नै गर्न नसकेको प्रतिक्रिया दिएका छन् । अर्यालले भने, “हामीले विधेयक फिर्ता लिनुपर्ने, त्यो गर्न नसके संशोधन गरिनुपर्ने माग राखेका थियौं तर सरकार भने त्यो कुनै माग सम्बोधन गर्ने पक्षमा देखिएन ।” मुख्य विषयमा नै कुरो नमिलेपछि यतिकै औपचारिकता पूरा गरेर समय बर्बाद गर्नु अर्थ नभएको अर्यालको भनाइ छ ।

डा. केसीका मागप्रति सरकार संवेदनशील नै नभएको उनको आरोप छ । डा केसीलाई काठमाडौं ल्याएपछि करिब ५ दिनपछि मंगलबार वार्ता शुरु भएको थियो । मंगलबार बसेको वार्तामा डा. केसीले राखेका मागहरुमध्ये ६ वटा विषयमा समझदारी भएको बताइएको छ ।