सर्वोच्चले भन्याे ‘सुमार्गीको रकम रोक्का नगर’

काठमाडौं, २४ माघ – सर्वोच्च अदालतले अजयराज सुमार्गीको लगानी रहेको नेपाल स्याटेलाइट टेलिकम प्रालिको खातामा विभिन्न बैंकमा रहेको रकम रोक्का नगर्न नेपाल राष्ट्रबैंकका नाममा अन्तरिम आदेश जारी गरेको छ ।

न्यायाधीश तेजबहादुर केसीको एकल इजलासले मंगलबार कारण देखाऊ आदेशसहितको अन्तरिम आदेश जारी गरेको हो ।राष्ट्रबैंकले व्यवसायी सुमार्गीले स्याटेलाइटको नाममा इन्भेस्टमेन्ट बैंकमा राखेको रकमको स्रोत नखुलेको भन्दै रोक्का गरेको थियो । सर्वोच्चको आदेशपछि उनले उक्त रकम निकाल्न पाउनेछन् ।  आजको नागरिक दैनिकमा खबर छ ।

उद्योग विभागले सुमार्गीले विदेशबाट ल्याएको रकमको स्रोत नखुलेकोे भन्दै २०६९ चैत २८ मा रोक्का गर्न राष्ट्रबैंकलाई पत्र पठाएको थियो । सोही पत्रअनुसार राष्ट्रबैंकले रकम रोकेको थियो ।

स्याटेलाइट प्रालिको तर्फबाट सुभाषचन्द्र पौडेलले गत आइतबार रकम झिक्न रोकिएको भन्दै राष्ट्रबैंक र इन्भेस्टमेन्ट बैंकलाई विपक्षी बनाई अन्तरिम आदेश माग गरी सर्वोच्चमा रिट दर्ता गरेका थिए ।

सर्वोच्चले रकम रोक्ने कानुनी कारण र आधार पारदर्शी रुपमा नदेखिएको भन्दै रकम रोक्का नगर्न/नगराउन आदेश दिएको हो । ‘रकम रोक्ने कानुनी कारण र आधार पारदर्शी रुपमा देखिएन,’ आदेशमा भनिएको छ । विषयको गाम्भीर्य हेरी दुवै पक्षलाई राखी फागुन २ मा छलफलका लागि आउन आदेश भएको सर्वोच्चका सञ्चारविज्ञ किशोर पौडेलले बताए ।

(Valium)