सार्वजनिक गुठीका नाममा जग्गाको खोजी !

ललितपुर, २१ साउन । जिल्लाका विभिन्न स्थानमा रहेका सार्वजनिक गुठीका नाममा रहेको जग्गाको खोजी शुरु भएको छ । गुठीका सम्पत्ति कति छ, भन्ने समेत यकिन नभएपछि खोजी शुरु भएको गुठी संस्थान ललितपुर शाखाका प्रमुख शैलेन्द्र पौडेलले बताए । गुठीका नाममा धेरै जग्गा भए पनि कतिपय जग्गा दर्ताको प्रक्रियामा छ भने कतिपय कहाँ छ भन्ने पत्तो छैन । गुठीका जग्गा पहिचान गरेर दर्ताको प्रक्रियामा लान शुरु भएको उनले बताए। पौडेलले भने, “सार्वजनिक गुठीका नाममा भएका जग्गा दर्ता गरेर मात्रै एकीकृत तथ्यांक थाहा हुन्छ ।” व्यक्तिले वषौंदेखि प्रयोग गरेर पनि गुठीले केही आम्दानी नपाएको जग्गाको खोजी पनि भइरहेको उनले बताए। महानगरपालिका क्षेत्रमा मात्रै तीन÷चार स्थानमा खाली जग्गा भेटिएको छ ।

सुन्धारादेखी मंगलबजारसम्म झण्डै ४० वटा कवलपसल छन् । उनी भन्छन् “स्थानीयवासीलाई असर नपर्ने स्थानमा खाली जग्गा र कवल चलनचल्तीको दरमा भाडामा लगाउन सकिन्छ ।,” स्थानीय निकायसँगको सहकार्यमा पुस्तौंदेखि भाडा नतिरि बसेका पसल–कवललाई चलन–चल्तीको भाडादरमा लगाउन प्रयास भइरहेको उनले बताए। जिल्लामा सबैभन्दा बढी रातो मछिन्द्रनाथको नाममा जग्गा छ । त्यसबाहेक अरु विभिन्न मन्दिर, देवल र सत्तलका नाममा समेत धेरै अचल सम्पत्ति छ । तीमध्ये कतिपय जग्गा बेवारिसे अवस्थामा त कतिपय वषौँदेखि व्यक्तिले प्रयोग गरिरहेका छन् ।