साहुको रिसले छोरा मारेर प्रहरीसँगै आफैले बालक खोजेजस्तो गर्दै सघाएपछि…

काठमाडौं । एक चालकले बच्चाको बाबुसँग जागिरको बारेमा भएको सानो विवादबाट उत्पन्न रिसको साटो फेर्न ८ वर्षे बच्चालाई मारेका छन् ।

गोंगबुको स्वस्तिक त्रिवेणी गेष्ट हाउसका सञ्चालक प्रविण कुँवरका ८ वर्षीय छोरा प्रयासलाई गेष्ट हाउसकै ड्राइभरले हत्या गरेको प्रहरीले जनाएको छ । महानगरीय प्रहरी अपराध महाशाखाका अनुसार स्याङ्जा भिरकोट नगरपालिका ७ घर भई हाल काठमाडौं २६ मित्रनगर बस्ने २२ वर्षका महेन्द्र एसके (सार्की)ले गेष्ट हाउसका साहुसँग जागीरको विषयमा सानो विवाद भएपछि बालकको अपहरण गरी हत्या गरेका हुन् ।

गेष्ट हाउसका सञ्चालक दम्पत्तीले चालक सार्कीलाई बालक अपहरण र हत्याको शंका पनि गरेका थिएनन् । उनी एक महिनादेखि त्यस गेष्ट हाउसमा सवारी चालकका रुपमा काम गर्दै आएका थिए । बालक बेपत्ता भएको प्रहरीमा उजुरी परेपछि दुई दिनदेखि खोजेको थियो । प्रहरी र परिवारसँगै बालक खोज्न सार्कीसमेत हिडेका थिए ।

चालक सार्कीको बयानका आधारमा प्रहरीले खोजी गर्दा गोंगबु म्हैपी पुलमुनि बालकको मृत अवस्थामा झोलामा राखिएको फेला परेका थिए ।

सार्कीले दिएको बयान अनुसार गेष्ट हाउस सञ्चालक जागिरबाट निकालिदिने चेतावनी दिएका थिए । हत्यामा संलग्न रहेको आशंकामा प्रहरीले बिहीबार दिउँसो पक्राउ गरी सोधपुछ गर्दा रहस्या खुलेको हो । अनुसन्धान बाँकी रहेको र प्रारम्भिक अनुसन्धानमा बाउको रिसले हत्या गरेको स्वीकार गरेको छ ।

मंसिर ११ गते बालकका बाबुआमा स्वास्थ्य जाँचका लागि अस्पताल गएका थिए । त्यही बेला होटलमा कोही नभएको मौका पारी चकलेट देखाएर लोभाइ आफैले चलाउने गाडीमा हाली अपहरण गरेका थिए ।

केही समयपछि बेलुका पौने ७ बजेतिर नागार्जुन जंगलमा लगेर नाकमुख थुनेर घाँटी थिची हत्या गरेर झोलामा हाली फालेको प्रहरीले जनाएको छ ।