सिन्धुपाल्चोकका पहिरो पीडितलाई सहयोग

काठमाडौँ ( शेर्पा कल्चर ग्रुप बेल्जियमले पहिरो पीडितहरुलाई राहत सहयोग गरेको छ । हिमालयन शेर्पा साँस्कृतिक केन्द्रको संयोजकत्वमा सिन्धुपाल्चोकस्थित भोटेकोशी गाउँपालिकाका पहिरोपीडितलाई राहत वितरण गरिएको हो ।

पहिरो पीडित परिवारलाई शेर्पा कल्चर ग्रुप बेल्जियमको आर्थिक सहयोगमा हिमालयन साँस्कृतिक केन्द्रको समन्वयनमा भोटेकोशी गाउँपालिकाका–४ का वडाध्यक्ष साङ्दोर्जे शेर्पाको रोहवरमा राहत तथा आर्थिक सहयोग उपलब्ध गराइएको हो ।

भोटेकोशी गाउँपालिका–४ का ३०० पीडित परिवारलाई दैनिक उपभोग्य वस्तु दाल, चामल, नुन, तेललगायत सामग्री वितरण गरेको हिमालयन शेर्पा साँस्कृतिक केन्द्रका अध्यक्ष छिरिङ शेर्पाले जानकारी दिए । उनका अनुसार शेर्पा कल्चर ग्रुप बेल्जियमले संकलन गरी पठाएको राहत वडामा समन्वय गरी हिमालयन शेर्पा साँस्कृतिक केन्द्रमार्फत पीडित परिवारलाई सहयोग उपलब्ध गराइएको हो । पहिरोमा मृत्यु भएका नौ जनाका परिवारलाई भने पाँच हजारका दरले नगद उपलब्ध गराएको अध्यक्ष शेर्पाले बताए ।

भोटेकोशी गाउँपालिका अन्तर्गत करिब २० गाउँका ५०० भन्दा बढी घरपरिवार पहिरोबाट समस्यामा परेका छन् । वडाध्यक्ष साङदोर्जी शेर्पाले वडा नम्बर ४ मा मात्र १० वटा गाउँका १६० परिवार विस्थापित भएका र पाँचजनाको ज्यान गएको जानकारी दिए । अध्यक्ष शेर्पाले वडा कार्यालयले विभिन्न संघसंस्था तथा व्यक्तिसँग समन्वय गरी पीडित परिवारलाई हालसम्म चारपटक राहत उपलब्ध गराइसकेको बताए । पहिरोमा परी बस्ने घरसँगै घरभित्र भएका खानेकुरा सबै पुरिएको थियो । उनले कोरोना महामारीका कारण मानिसहरू काममा जाने वातावरण समेत नभएको बताए ।

पहिरोपीडित परिवारलाई गाउँमै पुगेर राहत उपलब्ध गरेको र राहत वितरण कार्यक्रममा हिमालयन शेर्पा साँस्कृतिक केन्द्रका महासचिव सेर्कु शेर्पा, युवा संघका अध्यक्ष जाङ्बु शेर्पा, शेर्पा सञ्चार समूह नेपालकी अध्यक्ष निम्लेकी शेर्पा वडाध्यक्ष साङदोर्जे शेर्पा लगायत उपस्थित थिए ।