सुपर ग्यास उद्योगमा यसरी भयो भीषण आगलागी (हेर्नुहोस् ६ तस्बिरमा)

• पर्सा संवाददाता

  वीरगन्ज, पुस ६ । वीरगन्ज महानगरपालिकाभित्र रहेको सुपर ग्यास उद्योगमा बुधबार बिहान (हिजो) को समयमा भीषण आगलागी भयो ।  ग्यास भण्डारण ट्याङ्कीबाट ग्यास लिक भई आगलागी सुरु भएको थियो । उक्त ग्यास उद्योगमा  लागेको आगो  ९ घण्टापछि मात्र नियन्त्रणमा आएको हो ।

आगलागी नियन्त्रणका लागि वीरगन्ज महानगरपालिकाबाट परिचालित दमकल पनि जलेर ध्वस्त भएको छ । घटनामा परी महानगरपालिकाका आग्नि नियन्त्रक मधुसूदन मिश्र र यादवप्रसाद अधिकारीको मृत्यु भएको छ ।

दमकलसहित आगो निभाउन सुपर ग्यासको मूल ढोकामा पुगेर पानी हाल्ने क्रममा अचानक ग्यासको एउटा प्लान्ट नै विस्फोट भएपछि उनीहरूको घटनास्थलमा नै जलेर ज्यान गएको प्रहरीले जनाएको छ । घटनामा परी २ जना गम्भिर घाइते भएका छन् । उनीहरुलाई थप उपचारको लागि काठमाडौं पठाइएको जिल्ला प्रहरी कार्यालय पर्साले जानकारी दिएको छ । घटनामा परी गम्भीर घाइते हुनेहरुमा कामदार अमिका पटेल र सुरक्षा गार्ड सन्दीप नेपाल रहेका छन् ।

उद्योगमा जडान गरिएका तीनवटा बुलेटमा आगो लागेपछि पड्किने आशंकामा स्थानीय प्रशासनले उद्योग नजिकका बासिन्दालाई सुरक्षित स्थानमा स्थान्तरण गरेको छ । उद्योगमा आगलागी हुँदा साना ग्यास सिलिण्डरहरु पड्केको आवाज टाढासम्म आइरहेको थियो । सुरक्षाकर्मीले १ किलोमिटर अगाडि नै इटियाही पोखरी नजिकबाट कसैलाई जान दिएको थिएन् ।

फेरि कुनै पनि बेला आगलागी हुन सक्ने भन्दै स्थानीयहरुलाई सुरक्षित स्थानमा स्थान्तरण गरिएको प्रहरीले जनाएको छ । आगो नियन्त्रणका लागि खास प्रविधि नभएका कारण समयमा आगो नियन्त्रणमा लिन कठिनाइ परेको पर्साका प्रमुख जिल्ला अधिकारी विनोदप्रताप सिंहले जनाए ।

उक्त ग्यास उद्योग ७ वर्षअघि स्थापना भएको हो । ग्यास उद्योगको संचालक अवुलेश अन्सारी हुन् । अवुलेश वीरगन्ज हेल्थ केयर हस्पिटलका सञ्चालक पनि हुन् । आगलागीबाट आफ्नो सर्वश्व गुमेको अन्सारीले बताए ।