स्थानीय तह निर्वाचनमा प्रमुख तीनै दलकै जितको खाता खुल्यो !

काठमाडौं,बैशाख १९ – स्थानीय तह निर्वाचनमा नेपाली कांग्रेसले जितको खाता खोलेको छ । हिमाली जिल्ला मनाङको नार फू गाउँपालिकामा नेपाली कांग्रेसका उम्मेदवार निर्विरोध निर्वाचित भएको निर्वाचन अधिकृत रामप्रसाद अधिकारीले जानकारी दिएकाछन । नार फू गाउँपालिकामा मिङमर छिरिङ लामा निर्बिरोध निर्वाचित भएका हुन । कुल ३ वडा रहेको नार फू गाउँपालिकामा प्रमुख पदका लागि कुनैपनि दोहोरो उमेदवारी नपरेकोले लामा स्वतः निर्वाचित भएको निर्वाचन आयोगले जनाएको छ ।
यसैबीच म्याग्दीको रघुगंगा गाउँपालिका–४ दग्नामको वडाअध्यक्षमा नेपाली काँग्रेसका एकबहादुर गर्बुजा निर्विरोध निर्वाचित भएका छन् । मंगलबार भएको मनोनयन दर्तामा वडा ४ को वडाअध्यक्षमा गर्बुजाको मात्रै उम्मेदवारी परेपछि निर्विरोध अध्यक्ष भएका हुन् ।
यस्तै मुगु जिल्लाको छायाँनाथ रारा नगरपालिका वडा नं ९ मुर्मा (रारा ताल नजिकको रारा ताल भएको वडा) मा नेकपा (माओवादी केन्द्र)का वडाध्यक्षका उम्मेदवार मणिचन्द्र रोकाय निर्विरोध निर्वाचित भएका छन् । ६ नंम्बर प्रदेशले वडाध्यक्षमा खाता खोलेको छ । स्थानीय तहको पहिलो वडाध्यक्षलाई बधाई तथा सफल कार्यकालको शुभकामना ।

एमालेले मण्डन देउपुर नगरपालिकाबाट खाता खोलेको छ । काभ्रेको मण्डन देउपुर नगरपालिका वडा नम्बर २ मा एमाले उम्मेदवार नारायणी दमाई निर्विरोध चयन भएकी छन् । २ नम्बर वडामा अन्य पार्टीको उम्मेदवारी नपरेपछि उनी निर्विरोध भएकी हुन् ।

दलित समुदायकी नारायणी निर्विरोध भएपछि एमालेजनले ‘संविधानको उपहार, दलित समुदायमा बहार’ नारा लगाउँदै उनको प्रशंसा गरेका छन् ।

सिन्धुपाल्चोकमा पनि विजयी सुरुवात

यसैबीच सिन्धुपाल्चोक जिल्लामा पनि एमालेले विजय सुरुआत गरेको खबर प्राप्त भएको छ । स्थानीय नेताका अनुसार सिन्धुपाल्चोक मेलम्ची नगरपालिका ४ नम्बर वडा सदस्यमा कृष्णा कुमारी नेपाली र सिन्धुपाल्चोक इन्द्रावती गाउँपालिका १२ नम्बर वडा सदस्यमा गीता सोनाम निर्बिरोध निर्बाचित भएका छन् ।