स्वीस सरकारको पठाएको ३० हजार पिसिआर किट आज बेलुका नेपाल आइपुग्ने

किटको अभावको कारण देशका कतिपय प्रयोगशालामा कोरोना संक्रमण परीक्षण रोकिएको अवस्थामा स्वीजरल्याण्ड सरकारको सहयोगमा उपलव्ध ३० हजार पीसीआर किट बिहीबार बेलुका काठमाडौं आइपुग्दैछ ।

पीसीआर किटसँगै र त्यति नै परिमाणमा आरएनए एक्सट्रयाक्टस किट पनि आइपुग्ने स्वास्थ्य मन्त्रालयले जानकारी दिएको छ । अष्ट्रेलिया पुगेको नेपाल वायुसेवा निगमको वाइडवडी विमानले ती किट काठमाडौ ल्याउने भएको हो । स्वीस सरकारको सहयोगमा आउन लागेको ठूलो परिमाणको किट ल्याउने माध्यम नहुँदा सिंगापुरमै रोकिएको थियो ।

स्वास्थ्य तथा जनसंख्या मन्त्रालयका प्रमुख विशेषज्ञ डा. रोशन पोखरेलले ती किट बुधबार बेलुका नै विमानमा लोड भइसकेको र बिहीबार बेलुका छ बजेसम्ममा वाइडबडी विमान काठमाडौँ अवतरण गर्ने तालिका रहेको जानकारी दिए । किट आएपछि परीक्षण तीव्र रुपल अगाडि बढाइने उनको भनाई छ ।

डा. पोखरेलका अनुसार सिंगापुरमा रहेको किटलाई हिजो नै स्थलमार्गबाट मलेसियाको राजधानी क्वालालम्पुर ल्याइएको थियो । अष्ट्रेलियाको सिड्नीका लागि चालक दलका सदस्यसहित ३०० यात्रु बोकेर उडेको सो चार्टड विमान क्वालालम्पुरमा इन्धन भर्नका लागि अवतरण गरेको थियो । त्यसबेला नै किट लोड गरिएको थियो ।