स्व. प्रकाश दाहालको स्तम्भ मन्त्री विना द्वारा शिलान्यास !

काठमाडाै, २३ जेठ । नेकपाका अध्यक्ष पुष्पकमल दाहाल‘प्रचण्ड’का छोरा स्व. प्रकाश दाहालको स्मृतिमा नुवाकोटको ककनीमा स्तम्भ निर्माण गरिने भएको छ।

सगरमाथा आरोही प्रकाशको सम्झनामा नेपाल पर्वतारोही संघको सक्रियतामा स्तम्भ बनाउन लागिएको पर्वतारोही संघका अध्यक्ष सन्तविर लामाले बताए।

ककनीस्थित अन्तर्राष्ट्रिय पर्वतारोही स्मृती उद्यानमा बन्न लागेको स्वर्गीय दाहालको स्तम्भको मंगलबार खानेपानी मन्त्री विना मगरले शिलान्यास गरिन्।

स्वर्गीय दाहाल मन्त्री मगरका पति हुन्। प्रकाशसँगै सगरमाथा आरोहण गरेकी मन्त्री मगरले प्रकाशको मात्रै होइन, अन्य आरोहीको नाममा पनि स्तम्भ निर्माण गरिनुपर्ने बताईन्। ‘राजनीतिक परिवर्तन र संविधान जारी गर्न दबाब दिने उद्देश्यसहित गरिएको सो आरोहणका सहभागिको नाममा स्तम्भ निर्माण हुनु आफैमा गौरवको विषय हो,’ मन्त्री मगरले भनिन्, ‘उहाँ (प्रकाश) सहित सबै आरोहीको नाममा स्तम्भ बन्नुपर्छ।’

नुवाकोट प्रकाशको पहिलो ससुराली जिल्ला हो,दिवंगत नेता पोस्ट बहादुर बोगटीकि छोरी प्रभा संग प्रकाशको पहिलो बिबाह भएको थियो।

विश्व वातावरण दिवसको अवसर पारेर मंगलवार ककनी उद्यानमा विभिन्न प्रजातिका ४ सय ५० विरुवा पनि रोपिएको थियाे ।