३३ किलो सुन प्रकरण : फेरि अर्का व्यापारी पक्राउ !

सरकारले गृहका सहसचिव ईश्वरराज पौडेलको नेतृत्वमा बनाएको अनुसन्धान टोलीले हुण्डी व्यवसायीका रुपमा कुख्यात रहेका पोद्दारलाई मंगलबार नियन्त्रणमा लिएको हो।

समितीले पोद्दारसँग सोधपुछ गरिरहेको छ। नेपालखबरका अनुसार  काठमाडौंका केही प्रतिष्ठित व्यवसायीका अदृश्य साझेदार रहेका पोद्दार यसअघि समेत विदेशी मुद्रा र सुन तस्करी प्रकरणमा जाेडिँदै अाएका थिए। उनी पहिलो पटक पक्राउ परेका हुन्।

समिति स्राेतकाअनुसार अनुसन्धानमा तानिएका पाेद्दारसँग साेधपुछ भइरहेकाे हाे। बुधबार साँझसम्म पाेद्दारबिरुद्ध थप अनुसन्धानका लागि म्याद  लिने तयारी गरिएकाे छ।  त्रिभुवन अन्तर्राष्ट्रिय विमानस्थलबाट २०६९ मा विदेश जान लागेको १ करोड २४ लाख विदेशी मुद्रा बरामद भएपछि सो काण्डमा मुछिएका पोद्दार त्यसबेला जोगिन सफल भएका थिए। प्रहरीका बहालवाला एसएसपी रबिराज श्रेष्ठ बर्खास्त भएको सो घटनामा पक्राउ परेका असई हिराकाजी कुमालले पोद्दारकाे धन्दाबारे खुलाएका थिए। तर त्यतिबेला उनी पक्राउ परेनन्।

कुमालले तत्कालीन विमानस्थल प्रमुख रहेका डिआईजी विज्ञानराज शर्मासहितका प्रहरी अधिकारीको सम्पर्क पोद्दारसँग रहेको र उनीमार्फत विदेशी मुद्रा बाहिर जाने र सुन भित्रने खुलासा गरेका थिए। सो घटना सेलाउदासम्म भाग्दै हिडेका पोद्दार गिरफ्तारीले सुन तस्करीको संगठित अपराध सञ्जालमा रहेका प्रहरी अधिकारी र व्यापारी अनुसन्धानमा तानिने सम्भावना बढेको छ।