बल्ल वैधानिक दल बन्यो नेपाल कम्युनिष्ट पार्टी

काठमाडौं, २५ जेठ – निर्वाचन आयोगले दुई पार्टी एक बनेको नयाँ नेपाल कम्युनिष्ट पार्टी (नेकपा) लाई प्रमाणपत्र दिएको छ । आयोगको प्रमाणपत्रसँगै एमाले र माओवादी केन्द्र मिलेर बनेको नेकपा वैधानिक पार्टी बनेको छ ।

नाम जुधेको भन्दै यसअघि राखेको नेकपा अन्डरलाईन हटाएर नेपाल कम्युनिष्ट पार्टी (नेकपा) दर्ता भई प्रमाणपत्र दिइएको हो । आयोगले साविकका एमाले र माओवादी केन्द्रको नाम, झन्डा र चुनाव चिह्न अरू कुनै दललाई दिन नपाउने गरी दल दर्ताको प्रमाणपत्र दिएको हो ।

प्रमुख निर्वाचन आयुक्त अयोधीप्रसाद यादवले नेकपाका महासचिव विष्णु पौडेलले दल दर्ताको प्रमाणपत्र हस्तान्तरण गरेका थिए । प्रमाणपत्र लिने समयमा संसदीय दलका उपनेता सुवास नेम्वाङ, नेता देव गुरुङ सहितका नेता निर्वाचन आयोग पुगेका थिए । आयोगका अनुसार नेकपाको क्रमसंख्या ४५ मा दर्ता भएको छ ।

आयोगको बैठकले राजनीतिक दलसम्बन्धी ऐन, २०७३ को दफा १० अनुसार नेकपालाई चुनाव चिह्न सूर्य र झन्डा हँसिया हथौडा दिने निर्णय गरेको छ । ऐनमा भनिएको छ, ‘दल एकीकरण भएको वा गाभिएकोमा एकीकरण हुनु वा गाभिनुअघि त्यस्ता दलले प्रयोग गरेको नाम, झन्डा वा चिह्न एकीकरण भएको वा गाभिएको मितिले एक वर्षसम्म कसैले प्रयोग गर्न सक्नेछैन ।’