गृहमन्त्री थापाले संसदमा पाँच वटा वार्षिक प्रतिवेदन पेस

काठमाडौ २०,भदौ। गृहमन्त्री रामबहादुर थापाले प्रतिनिधिसभाको बैठकमा पाँच वटा वार्षिक प्रतिवेदन पेस गरेका छन्।प्रधानमन्त्री केपी शर्मा ओलीका तर्फबाट गृहमन्त्री थापाले अख्तियार दुरुपयोग अनुसन्धान आयोगको आव २०७३/७४ को २७औं वार्षिक प्रतिवेदन, निर्वाचन आयोगको आव २०७३/७४ को वार्षिक प्रतिवेदन र राष्ट्रिय मानवअधिकार आयोगको आव २०७३/७४ को वार्षिक प्रतिवेदन पेस गरे।

 नेपाल सरकारको आव २०७३/७४ को सुशासन प्रतिवेदन र राज्यका निर्देशक सिद्धान्त, नीति र दायित्व कार्यान्वयनका सम्बन्धमा गरेका काम र प्राप्त उपलब्धिसहितको आव २०७३/७४ को नेपाल सकरारको वार्षिक प्रतिवेदन पनि उनले पेस गरेका छन्।

आजको प्रतिनिधिसभाको बैठक कार्य सूचीमा कानुन, न्याय तथा संसदीय मामिला मन्त्री भानुभक्त ढकालले सर्वोच्च अदालतको आव २०७३/७४ को वार्षिक प्रतिवेदन, महान्यायाधिवक्ताको आव २०७३/७४ को वार्षिक प्रतिवेदन र न्याय परिषद् र न्याय सेवा आयोगको आव २०७३/७४ को वार्षिक प्रतिवेदन पेस गर्ने भए पनि कार्यसूचीबाट हटाइएको थियो।