चितवनमा आइसोलेसनमा राखिएका एक युवकको मृत्यु, परीक्षण रिपोर्ट भने आउन बाँकी

चितवनको भरतपुर कोरोना विशेष (अस्थायी) अस्पतालमा एक जना विरामीको मृत्यु भएको छ। कोरोना भाइरस (कोभिड–१९)को संक्रमण भएको आशंकामा अस्पतालको आइसोलेसनमा उपचार गराइरहेका वीरगंज घर भएका ३० वर्षीय सन्तोष यादवको मृत्यु भएको अस्पतालले जनाएको छ । विरामीलाई पहिलेदेखी नै लुपस भन्ने रोग रहेको थियो। उक्त रोगका कारण मृगौला कमजोर भएको र आइतबार ज्वरो र निमोनियाको लक्षण देखिएपछि चितवन मेडिकल कलेजले कोरोना भाइरसको आशंकामा कोरोना विशेष (अस्थायी) अस्पतालमा रिफर गरेको थियो। अस्पतालका प्रवक्ता डा. भोजराज अधिकारीले मंगलबार बिहान ९ बजेर ३० मिनेटमा बिरामीको मृत्यु भएको जानकारी गराएका छन्।। सोमबार दिउँसोबाट बिरामीलाई श्वासप्रश्वासको समस्या अत्याधिक बढेपछि सघन उपचार कक्ष (आइसियु)मा राखेर उपचार गरिएको थियो। कोरोना भाइरसको लक्षण मिलेपछि बिरामीको स्वाब परिक्षणको लागि सोमबार काठमाडौँ पठाइएको तर रिर्पोट अझै आइसकेको छैन। कोभिड–१९ को परिक्षणको रिपोर्ट नआउदासम्म शव अस्पतालमै राखिने पनि अस्पतालले जनाएको छ।