‘रैथाने मधेशी जुनसुकै पदमा पुग्न सक्छन, तर अंगीकृतलाई प्रमुख पद दिदैनौ’-एमाले महासचिव

विरगंज, १७ साउन । नेकपा एमालेका महासचिव इश्वर पोखरेलले अंगीकृतलाई प्रमुख पद दिएर तराईका रैथाने नेपालीलाई विस्थापित गर्न मञ्जुर नभएको बताएका छन् । प्रेस चौतारी नेपालको प्रदेश नम्वर २ को विस्तारित बैठकलाई विरंगजमा उद्घाटन गर्दै महासचिव पोखरेलले राष्ट्रका प्रमुख पदमा अंगीकृतलाई ल्याउने प्रस्ताव आफुहरुलाई मान्य नहुने बताए ।

नागरिकताको विषयमा नेपालको संविधानमा भएको व्यवस्था दक्षिण एशियाली मुलुकमै उत्कृष्ट रहेको महासचिव पोखरेलको भनाई थियो । एमाले नागरिकता विरोधी भन्ने विषयलाई मधेशमा बढि उछालिएकोप्रति टिप्पणी गर्दै पोखरेलले एमालेको आपत्ति मुलुकमा प्रमुख पदहरुमा अंगिकृतलाई राख्नु हुँदैन भन्ने मात्रै रहेको बताए ।

यहाँका रैथाने मधेशीलाई नेपालको जुनसुकै पदमा पुग्नका लागि कुनै समस्या नभएको तर अन्य देशबाट आएका नागरिकलाई माथिल्लो पदमा पुग्न संविधान संशोधन गर्नुपर्छ भन्ने कुराको कुनै तुक नहुने उनको भनाई थियो । उनले भने, ”राष्ट्रपति, उपराष्ट्रपति, प्रधानमन्त्री, प्रधानन्यायाधीश, प्रतिनिधि सभाका सभामुख, राष्ट्रिय सभाका अध्यक्ष, प्रदेश प्रमुख, मुख्यमन्त्री, प्रदेश सभाको सभामुख र सुरक्षा निकायका प्रमुखको पद अंगीकृत नागरिकलाई दिएर तराईमा बसिरहेका रैथाने मधेशी जनतालाई विस्तापित गर्ने कुरा हामी कुनै पनि हालतमा मान्दैनौ ।”

महासचिव पोखरेलले अहिलेसम्म भएका ६ वटा प्रदेशको निर्वाचनमा पनि गठबन्धनहरु एमालेका सामु पराजित भएको बताउदै २ नम्वर प्रदेशमा हुने स्थानिय तहको निर्वाचनमा जतिसुकै ठुलो गठबन्धन वा महागठबन्धन आएपनि एमाले पहिलो पार्टी बन्ने ठोकुवा पनि गरे । पोखरेलले एमाले बहुमत सहितको ठुलो पार्टी नभए मुलुकका लागी दुर्भाग्यपूर्ण हुने बताउदै तीन वटै तहमा बहुमत ल्याउने समेत स्पष्ट पारेका थिए ।

उनले मधेश र मधेशी जनताका पक्षमा एमाले नेतृत्वको सरकारले गरे जति काम अन्य कुनै दल गर्न नसकेको बताए । अधिकार सम्पन्न समृद्ध मधेशको खाका एमालेले ल्याउने तर त्यसलाई यहाँ रहेका मधेशवादी भनिएका दलले गलत व्याख्या गर्ने प्रबृत्ति देखिएकोले त्यसको भण्डाफोर गर्न पत्रकारहरुलाई आग्रह गरे ।

मनमोहन अधिकारी प्रधानमन्त्री भएकै बेलादेखि एमालेले मधेशको नागरिकता समस्या समाधानको लागि अधिकार सम्पन्न आयोग बनाएर काम गरेको भएपनि कांग्रेसले त्यसलाई लागु हुन नदिएको उनले बताए । आज मधेशवादी दलमा नेतृत्व गरीरहेका व्यक्तिहरु हिजोको दिनमा कांग्रेसमै बसेकोले त्यस विषयमा आवाज नउठाएको महासचिव पोखरेलले उल्लेख गरे ।