जापानमा भिड्दै नेपाली कराते खेलाडी, प्रचण्डले गरे विदाइ

पूर्वप्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले जापानमा हुने नवौं वादोरियो कराते डो अन्तर्राष्ट्रिय प्रतियोगिता २०२४ मा सहभागी हुने खेलाडीलाई बिदाइ गरेका छन् । अध्यक्ष प्रचण्डले मंगलबार खुमलटारमा आयोजित विदाई कार्यक्रममा उनीहरूलाई बिदाइ गरेका हुन् । विदाई कार्यक्रममा बोल्दै अध्यक्ष प्रचण्डले खेलाडीलाई पदक जित्न समेत शुभकामना दिए भने वादोरियो कराते डो संघले भोगिरहेको समस्याको बारेमा आफु जानकार रहेको उल्लेख गर्दै त्यसलाई आफुले गम्भिररुपमा लिएको पनि बताए । संघको समस्या समाधान गर्न आफ्नो तर्फबाट पहल गर्ने पनि उनले बताए ।

प्रचण्ड निवासमा आयोजित विदाइ कार्यक्रममा नेपाल वादोरियो कराते डो संघका केन्द्रीय अध्यक्ष हरिशरण केसीले वादोरियो डा संघले भोगिरहेको समस्याको बारेमा पुनः जानकारी गराए । करातेको विकासमा राज्यले खासै चासो नदेखाएको गुनासो गर्दै जापानमा हुने यो प्रतियोगिताका लागि पनि आफ्नै नीजि खर्चमा खेलाडी पठाउन लागेको उनको भनाइ छ ।

यही भदौ ८ र ९ गते जापानको टोकियोमा अन्तर्राष्ट्रिय प्रतियोगितामा नेपाली खेलाडीहरू एलन श्रेष्ठ, सुस्मिता वाइबा, अनिल उपरकोटी र आरोन शेरचनसहित ६ सदस्यीय टोली सहभागी हुँदै छ ।