सुन तस्करीका नाइके पौडेललाई माओवादीमा किन भित्र्याइयो ?

काठमाडौँ । माओवादी केन्द्रबाट भोटेकोशी गाउँपालिकाका अध्यक्षमा निर्वाचित भएका राजकुमार पौडेल सुन तस्करीका मुख्य नाइकेका रूपमा प्रहरीको खोजीमा परेपछि त्यसले राष्ट्रिय राजनीतिमा समेत तरंग पैदा गरको छ । माओवादी केन्द्रकै उच्च तहका केहि नेता समेत यो काण्डसँग जोडिएपछि घटनाले नयाँ मोड लिएको हो ।

प्रहरीको खोजी सूचीमा परेका पौडेल नेपाली कांग्रेसका सक्रिय कार्यकर्ता हुँदै स्थानीय तह निर्वाचन मिति घोषणा भएपछि मात्रै माओवादी केन्द्रमा प्रवेश गरेका हुन् । दुई साताअघि राजधानीको टोखाबाट १४ किलो सुन बरामद हुने बित्तिकै फरार रहेका पौडेलको उठबस माओाादीका नेता अग्नि सापकोटासँग रहँदै आएको स्थानीय माओवादीका नेताले नाम नबताउने सर्तमा बताए । त्यसो त पौडेललाई माओवादी पार्टीमा भित्र्याउन सापकोटसँगै अर्का नेता वर्षमान पुन अनन्तले समेत पहल गरेको ती नेताले जानकारी दिए ।

सुनसँगै पक्राउ परेका पेम्बा शेर्पालगायतको बयान र अन्य स्रोतबाट सुन तस्करीका मुख्य योजनाकारका रूपमा देखिएपछि केन्द्रीय अनुसन्धान ब्युरो (सीआईबी) ले पौडेलको खोजी गर्दै आएको हो । स्थानीय नेता कार्यकर्तालाई टिकट नदिई सापकोटा र अनन्तकै ठाडो आदेश र योजनामा ४० वर्षीय पौडेललाई उम्मेदवारी मनोनयनको केही दिनअघि मात्र टिकट दिएको थियो ।

केही वर्षअघिसम्म तातोपानी नाका हुँदै तिब्बततर्फ रक्तचन्दनको व्यापक तस्करी चल्दा समेत पौडेल सक्रिय थिए । सापकोटा र अनन्तकै आशीर्वाद पाएका कारण पौडेल सुरक्षित रहँदै आएको स्रोतले जानकारी दिएको छ । यी दुई नेताकै आडमा पौडेलले रक्तचन्दनको कमाइलाई अबैध सुनको तस्करीमा लगानी गरेको समेत स्रोतको दाबी रहेको छ ।

पौडेलको पुरै परिवार अवैध धन्दामा संलग्न रहँदै आएका छन् । भारतमा लुकेर बसेका पौडेलको अहिले पनि माओवादीका यी नेतासँग नियमित सम्पर्क गर्ने गरको स्रोतले बताएको छ । सिन्धुपाल्चोक फुल्पिङकट्टीका पौडेल नेपाल ट्रक कन्टेनर व्यवसायी संघका पूर्वअध्यक्ष समेत हुन् । उनी तातोपानी नाकामा व्यवसायमा सक्रिय थिए । भूकम्पले तातोपानी नाका बन्द भएपछि उनी केरुङमा सक्रिय भए ।

पौडेल परिवारका चारै दाजुभाई तस्करीमा जोडिँदै आएका छन् । उनका दाजु बच्चु हुन्डी कारोबारमा जोडिने गरेका छन् । २०६९ भदौ ३० मा रक्त चन्दन तस्करीमा पक्राउ परेका ध्रुव पौडेल उनका दाजु हुन् । फुल्पिङकट्टीको स्यालाङकट्टी हुँदै ५० भन्दा बढी भरियालाई बोकाएर ६ टन रक्तचन्दन तातोपानी नाका पार गराउने क्रममा प्रहरी र तस्करबीच जम्काभेट हुँदा गोली चलेको थियो ।

पौडेलको अपराधिक गतिविधि थाहा हुदाँहुदै उनलाई अनन्त र सापकोटले किन पार्टीमा भित्र्याएर टिकट दिएको भन्दै कार्यकर्ताले व्यापक असन्तुष्टि पोख्दै आएका छन् । कार्यकर्ताका असन्तुष्टिबीच जबर्जस्ती टिकट दिएर पौडेलको आपराधिक चरित्रलाई छोप्न नेताहरु नै लागेपछि कार्यकर्ताले सापकोट र अनन्तमाथि नै शंका गर्न थालेका छन् । यी दुई नेताले पौडेलबाट अनुचित आर्थिक लाभ लिएको माओबादी निकट उच्च स्रोतको दाबी छ ।

(https://www.newslive.com)