गुर्जा हिमालमा ९ को मृत्युः एउटा शव निकालियो

म्याग्दीको धौलागिरि गाउँपालिका-१ स्थित गुर्जा हिमाल आरोहण गर्न जाने क्रममा हिमआँधीमा परेर मृत्यु भएका नौ जनामध्ये एक जनाको अवस्था अझै पत्ता लाग्न सकेको छैन। भेटिएका आठ शवमध्ये आज (आइतबार) बिहान एउटा शव मात्र घटनास्थलबाट निकालिएको छ। अरू शव घटनास्थलमै अलपत्र छन्। धौलागिरि वडा नम्बर १ का अध्यक्ष झकबहादुर छन्त्यालले एउटा शव सिम्रिक एयरको हेलिकप्टरले गुर्जा गाउँनजिकै झारेर गएको  जानकारी दिए।

‘हेलिकप्टरले एउटा लास गाउँनजिकै झारेर गएको छ,’  वडाध्यक्ष छन्त्यालले भने,‘कपडामा बेरेर ल्याइएको छ कसको हो थाहा छैन।’ पोखराबाट आएको उक्त हेलिकप्टर घटनास्थल नगई फेरि उतै फर्किएको उनले बताए। आफूहरू घटनास्थलमा नभएकाले हेलिकप्टर किन फेरि घटनास्थल गएन भन्ने कुरा थाहा नभएको छन्त्यालले बताए। उनका अनुसार घटनास्थलमा दुई स्थानीय र दुई उद्धारकर्मी खटिएका छन्।गुर्जा हिमालको आधार शिविरमा बास बसेका चार नेपाली र पाँच कोरियाली नागरिकको मृत्यु भएको थियो।