सिंहदरबार पुग्यो सातै प्रदेशमा, सकियो पहिलो वैठक

काठमाडौं, २३ माघ – प्रतिनिधिसभा र प्रदेशसभाको चुनाव सकिएपछि देशका सातवटै प्रदेशमा पहिलो प्रदेश सभा बैठक सम्पन्न भएका छन् । यो सँगै नयाँ संविधान अनुसार संघीयताको व्यवहारिक अभ्यास र कार्यान्वयन शुरु भएको छ । यसअघि सिंहदरबारमा मात्र हुने वैठक सातै प्रदेशमा बसिसकेको छ ।

सोमबार प्रदेश १ र ४ मा पहिलो बैठक बसेसँगै मुलुक संघीयता व्यावहारिक कार्यान्वयनको चरणमा प्रवेश गरेको हो । आइतबार प्रदेश नम्बर ३, ५, ६ र ७ प्रदेशमा र प्रदेश ३ को १८ माघ र बैठक बसेका हुन् ।

प्रदेश १ को पहिलो बैठकमा सांसदहरूले आफ्नो प्रदेशलाई विकसित र धनी प्रदेश बनाउने संकल्प गरिसकेका छन् । त्यस प्रदेशमा विराटनगरमा बसेको बैठकमा ज्येष्ठ सदस्य ओमप्रकाश सरावगीको अध्यक्षता गरेका र सातजना सांसद बोलेका थिए । बैठकले प्रदेशसभा सञ्चालनका लागि अन्तरिम कार्यविधि, २०७४ पारित गरेको छ । प्रदेशको अर्को बैठक २९ माघमा बस्नेछ । आगामी फागुन ३ गते उपसभामुखको निर्वाचन हुनेछ ।

सोमबार प्रदेश ४ को पहिलो बैठक डेढ घन्टा बसेको थियो । पहिलो वैठकले प्रदेश सभा सञ्चालनसम्बन्धी अन्तरिम कार्यविधि, २०७४ पारित गरेको छ । बैठकमा सांसदहरूले आर्थिक समृद्धिमा जोड दिएका छन् । साथै अखण्ड र एकीकृत प्रदेश बनाउने उद्घोष गरेका छन् ।

त्यसैगरी प्रदेशको अर्को बैठक फागुन ३ गते बोलाइएको छ । त्यही दिन सभामुखको निर्वाचन हुनेछ । उपसभामुखको निर्वाचनको मिति सोही दिन तय गरिनेछ । प्रदेश २, ५, ६ र ७ को पनि वैठक बसिसकेको छ । सबै प्रदेशमा सभामुख र उपसभामुखको निर्वाचन भएपछि प्रदेश सरकार गठनको प्रक्रिया सुरु हुनेछ ।