चर्चा, चर्चा, फेरि चर्चामा आएका रेशम चौधरीको अब के होला ?

रेशम चौधरी । हो, २०७२ भदौ ७ गतेको टीकापुर घटनापछि रेशम चौधरी एकाएक चर्चाको चुलीमा पुगे । टीकापुर घटनाको नामले चर्चित यो घटनामा नेपाल प्रहरीका वरिष्ठ प्रहरी उपरीक्षक (एसएसपी) लक्ष्मण न्यौपानेसहित ५ प्रहरी, २ सशस्त्र प्रहरी र १ नाबालकको मृत्यु भएको थियो ।

रेशम चौधरी । हो, उनै रेशम चौधरी प्रहरीको “मोष्ट वाण्टेड” सूचीमा रहेकै बेला २०७४ मंसिर २० गते दोस्रो चरणमा भएको प्रतिनिधिसभा तथा प्रदेशसभा निर्वाचनमा आफू “फरार” रहेकै अवस्थामा कैलाली– १ बाट वाम गठबन्धनका बलिया उम्मेदवारलाई पनि झण्डै तेब्बर मतले पछार्दै प्रतिनिधिसभामा विजयी भएपछि फेरि एकपटक चर्चामा रहे । कुनै प्रचारै नगरी “मोष्ट वाण्टेड” रेशम चौधरी वामगठबन्धनको हुरीबतासलाई ठप्प पारेर विजयी हुँदा उनको चर्चा चुलिएको थियो ।

हो, उनै रेशम चौधरी । २०७४ फागुन १४ गते बिहानैदेखि एकाएक चर्चामा तेहरिएका छन् । उनी चर्चामा आउनुको यसपालिको कारण बन्यो, अदालतमा आत्मसमर्पण । अचानक अदालतको शरणमा पुगेको खबरले उनको चर्चा आउनु स्वाभाविक भएको छ ।

प्रतिनिधिसभा सदस्यमा तेब्बर मतले विजयी
टीकापुर घटनाको मुख्य अभियुक्त भनिएका रेशम चौधरी प्रतिनिधिसभा तथा प्रदेशसभा निर्वाचनमा ३४ हजार ३ सय ४१ मत ल्याई प्रतिनिधि सदस्यमा निर्वाचित भएका थिए । उनका निकटतम प्रतिद्वन्द्वी वामगठबन्धनकी उम्मेदवार गरिमा शाहले जम्मा १३ हजार ४ सय ६ मतमै चित्त बुझाएकी थिइन् । नेपाली कांग्रेसकी उम्मेदवार ईश्वरी न्यौपानेले पनि जम्मा ११ हजार २ सय ३ मतमै खुम्चिएकी थिइन् । टीकापुर घटनाको मुख्य अभियुक्तको रुपमा रहेका चौधरी २६ महिनादेखि प्रवासमा बस्दै आएका थिए । प्रवासबाटै वारिसनामार्फत उम्मेदवारी दिएका चौधरी प्रतिनिधिसभामा निर्वाचित भएपनि भूमिगत नै थिए । उनले प्रमाणपत्र नै प्राप्त गर्न सकेका छैनन् ।

रेशम चौधरीको पृष्ठभूमि
कैलालीको जानकी गाउँपालिका– ६ (साविक दुगौली गाविस–९) जगतपुरमा २०३४ साल असोज २१ गते रेशम चौधरी जन्मेका थिए । सानैदेखि साहित्य, गायन, खेलकुद, वक्तृत्वकलामा रुची भएका रेशमले राष्ट्रिय प्राथमिक विद्यालय पटाभार बर्दियाबाट प्रारम्भिक शिक्षा र वीरेन्द्र विद्यामन्दिर टीकापुरबाट माध्यमिक शिक्षा पूरा गरेका थिए । उनी त्रिभुवन विश्वविद्यालयबाट स्नाकोत्तर हुन् ।

समयले राजनीतिमा होमिदिए पनि उनी साङ्गीतिक क्षेत्रमा उत्तिकै रुची राख्थे । रेडियो नेपालबाट गीत गाउने पहिलो थारु गायकको रुपमा पनि उनी थारु समुदायमा परिचित छन् । चौधरीले ९३ वटा गीतिएल्बम बजारमा ल्याइसकेको बताइएको छ । खेलकुदका शौखिन उनले कराँतेमा पनि थ्री डन प्राप्त गरेका छन् भने खेल क्षेत्रमै स्थायी जागिरे थिए । उनले राष्ट्रिय प्रतिभा पुरस्कार, बहुमुखी प्रतिभा पुरस्कार, गोरखा दक्षिणबाहु, शुक्ल दीक्षित पुरस्कार, जयराज जैरु प्रकोप उद्धार पदक, गद्धी आरोहण पदकलगायत थुप्रै राष्ट्रिय पुरस्कार तथा पदक प्राप्त गरिसकेका छन् ।

थारु भाषाको जोग्नी साहित्य पत्रिका परिवारको प्रधान सम्पादक रहेका चौधरीले २०५१ सालमा “विरही” नामक कविता संग्रह र “मोर बिहान” नामक कृति प्रकाशित गरेका छन् । साहित्य र पत्रकारितालाई सँगसँगै अगाडि बढाएका चौधरीले रेडियो नेपाल, नेपाल टेलिभिजन, रेडियो सगरमाथा लगायतमा काम गरेको लामो अनुभव हासिल गरेका छन् । टीकापुरसहित ३ स्थानमा उनको फूलबारी एफएम छन् ।

टीकापुर घटनाअघि पनि चर्चामै रेशम
धेरै क्षेत्रमा प्रतिभा देखाउन सफल रेशम चौधरी सञ्चारको पहुँच नपुग्दै तत्कालीन टीकापुरमा फूलबारी एफएम सञ्चालन गरेर चर्चामा आएका थिए । टीकापुरमै फूलवारी महोत्सव सञ्चालन गर्ने, हात्तीहरुको फुटबल खेल देखाउने, रेसलिङ खेलको आयोजना गरेर पनि उनी बेलामौकामा चर्चामा आइरहन्थे ।

नयाँ नेपालको नयाँ संविधान बन्ने क्रममा अखण्ड सुदूरपश्चिम र थरुहट÷थारुवान आन्दोलन उत्कर्षमा पुग्दा टीकापुर घटना भएको थियो । थरुहट आन्दोलनको प्रत्यक्ष नेतृत्व गरेको र त्यही समय टीकापुर घटना भएकाले उनी मुख्य अभियुक्त मानिएका छन् । जनताले अत्यधिक मतदान गरेर उनलाई चोख्याइसकेका छन् । यता, धेरै सोंचविचार र परामर्शपछि उनले अदालतकै शरणमा जाने विकल्प रोजेका छन् । प्रतिनिधिसभा सदस्यमा विजयी भएपछि आफू निर्दोष रहेकोले त्यो प्रमाणित गर्ने बताएका चौधरीको भविष्य के होला ? त्यो भविष्यले नै बताउने छ ।

यो पनि पढ्नुहोस्

https://shikharkhabar.com/2018/02/26/53712/

यो पनि पढ्नुहोस्

https://shikharkhabar.com/2018/02/26/53698/

यो पनि पढ्नुहोस्

https://shikharkhabar.com/2018/02/26/53677/