उज्यालो नेपाल बनाउने कुलमान ‘वर्षकै सर्वश्रेष्ठ सिइओ’

काठमाडौं, ३ फागुन- दैनिक १२ घण्टा लोडसेडिङबाट मुक्त गरी उज्यालो नेपाल बनाउने नेपाल विद्युत् प्राधिकरणका कार्यकारी निर्देशक कुलमान घिसिङ ‘वर्षको सर्वश्रेष्ठ सिइओ’ अवार्डबाट सम्मानित भएका छन् ।

ठूला बैंकर्सलाई पछि पार्दै घिसिङले अवार्ड पाएका हुन् । उनले अनिल शाह, कामिनी राजभण्डारी, चन्द्र ढकाललगायतलाई पछि पार्दै उत्कृष्ट सिइओ बन्न सफल भएका हुन् ।

सर्वसाधारणको एसएमएस भोटिङका आधारमा उनलाई सर्वश्रेष्ठ सिइओ छनोट गरिएको हो । विद्युत्को माग र आपूर्तिको कुशल व्यवस्थापन गर्न सफल उनलाई पूर्वप्रधानमन्त्री पुष्पकमल दाहालले अवार्ड प्रदान गरेका हुन् ।

सिइओ क्लबले बुधबार राजधानीमा आयोजना गरेको एक कार्यक्रममा अवार्ड दिइएको थियो । सर्वश्रेष्ठ सिइओसँगै उनले ‘बेस्ट सिइओ अफ पब्लिक सेक्टर’ र सर्वाधिक लोकप्रिय सिइओ अवार्ड पनि पाएका छन् ।