प्रधानमन्त्रीका लागि देउवाद्वारा मनोनयन दर्ता !

काठमाडौं, जेठ २० – नयाँ प्रधानमन्त्री चयनको लागि कांग्रेस सभापति शेरबहादुर देउवाले मनोनयन दर्ता गर्नुभएको छ । शनिबार बिहान संसद भवन नयाँ बानेश्वर पुगेर देउवाले प्रधानमन्त्रीका लागि मनोनयन दर्ता गर्नुभएको हो ।उहाँको प्रस्तावकमा माओवादी केन्द्रका अध्यक्ष समेत रहेका प्रधानमन्त्री पुष्पकमल दाहाल प्रचण्ड हुनुहुन्छ भने समर्थकमा कांग्रेसका वरिष्ठ नेता रामचन्द्र पौडेल, फोरम लोकतान्त्रिकका अध्यक्ष विजयकुमार गच्छदार, अखण्ड पार्टी नेपालका कुमार खड्का, समाजबादी जनता दलका प्रेमबहादुर सिंह, नेकपा संयुक्तका जयदेव जोशी समर्थक हुनुहुन्छ ।

कांग्रेस सभापति देउवाले मनोनयन दर्ता पछि संसदमा रहेका सबै दललाई प्रधानमन्त्रीमा आफूलाई समर्थन गर्न पत्र लेख्ने तयारी गर्नुभएको उहाँ निकट कांग्रेस नेताहरुले जानकारी दिएका छन् । बहुमतीय प्रक्रियाबाट प्रधानमन्त्री चयनको लागि बिहान ११ बजेदेखि ४ बजेसम्म उमेद्वारी दर्ताको समय तोकिएको छ ।

बेलुका साढे ४ बजे उम्मेद्वारको अन्तिम नामावली प्रकाशन गर्ने प्रधानमन्त्री चयनको लागि आइतबार बिहान ११ बजे मतदान गर्ने कार्यतालिका छ । सभामुख ओनसरी घर्तीले शुक्रबार कार्यव्यवस्था परामर्श समिति र राजनीतिक दलका नेताहरुसँगको छलफल पछि नयाँ प्रधानमन्त्रीको प्रक्रिया अघि बढाउने निर्णय गर्नुभएको हो ।