उमेर विवादमा बर्हिगमनमा परेका पूर्व प्रधानन्यायाधीश पराजुलीका काम सदर

काठमाडौं – सर्वोच्च अदालतले नागरिकतामा उमेर विवादका कारण बर्हिगमनमा परेका पूर्वप्रधानन्यायाधीश गोपाल पराजुलीका कामलाई सदर गरेको छ। पूर्वप्रधानन्यायाधीश पराजुलीले राष्ट्रपति विद्यादेवी भण्डारीलाई गराएको पद तथा गोपनीयताको सपथग्रहणलाई सदर गर्दै अन्य कामलाई समेत सदर गरेको हो।

न्यायाधीश सपना प्रधान मल्लको एकल इजलासले कुनै पदमा नियुक्त पदाधिकारीले काम गर्दा वैध देखिएकोमा पछिबाट कुनै कारणले अयोग्य ठहरेमा निजले गरेका काम कारबाही बदर नगर्ने मान्यता रहेको आदेश दिएको हो। सर्वोच्चले कुनै व्यक्ति पछि अयोग्य देखिए पनि त्यसअघि गरेका काम बदर नहुने ठहर गरेको छ । ‘कुनै पदमा नियुक्त पदाधिकारीले काम गर्दा वैध हुने र पछि कुनै कारणले अयोग्य भएमा काम कार्वाही बदर नहुने’ मान्यता रहेको ठहराएको छ।

गत फागुन ३० मा राष्ट्रपति विद्यादेवी भण्डारीले तत्कालीन प्रधानन्यायाधीश गोपाल पराजुलीबाट लिएको पद तथा गोपनीयताको सपथ असंवैधानिक भन्दै परेको निवेदन खारेज गर्दै सर्वोच्चबाट यस्तो व्याख्या भएको हो। सर्वोच्चको यो आदेशसँगै पूर्व प्रधानन्यायाधीश पराजुलीले गरेका न्यायिक काम बदर नहुने भएको हो। राष्ट्रपति भण्डारीलाई सपथ खुवाउने दिनमै न्यायपरिषद्को सचिवालयबाट गत साउनमै पदावधि सकिएको भन्दै पराजुलीलाई पत्र पठाइएको थियो। त्यससँगै राष्ट्रपतिको सपथसमेत असंवैधानिक भन्दै सर्वोच्चमा निवेदन परेको थियो।