शुक्लाफाँटा निकुञ्जमा च्याउ खोज्न गएका १४ महिला वेपत्ता: खोजीमा व्यापक सुरक्षाकर्मी परिचालन

कञ्चनपुरको भीमदत्त नगरपालिका–१९ स्थित दशरथ टोलका १४ जना महिलाहरू शुक्लाफाँटा राष्ट्रिय निकुञ्जको घना जङ्गलभित्र च्याउ खोज्न जाने क्रममा अचानक सम्पर्कविहीन भएका छन् । वर्षायाममा जङ्गली च्याउको खोजीमा निस्किएका ग्रामीण महिलाहरू जङ्गलमा अलपत्र परेपछि सिंगो गाउँ र निकुञ्ज क्षेत्रमा यतिबेला गम्भीर चिन्ता र त्रास छाएको छ ।

प्रहरीका अनुसार आइतबार बिहान करिब ११ बजेतिर ती महिलाहरू खाना खाएर निकुञ्जको मालुमेला पोस्टबाट भित्री जङ्गलतर्फ प्रवेश गरेका थिए । जङ्गलमा दुईवटा बेग्लाबेग्लै समूह बनाएर अघि बढेका उनीहरू साँझसम्म पनि घर नफर्किएपछि परिवारजनले खोजीका लागि स्थानीय प्रशासन र प्रहरीलाई गुहारेका हुन् ।

सम्पर्कविहीन हुनेहरूमा सकनी चौधरी, सविता चौधरी, सानी चौधरी, सकिया चौधरी, रमा चौधरी, लक्ष्मी चौधरी, मनिषा चौधरी, रिता चौधरी, सुनिता चौधरी, बिमला आग्री, सुमित्रा सुनार, शान्ति सुनार, प्रतिक्षा सुनार र सिवानी सुनार रहेका छन् । उनीहरू जङ्गलको कुन भागमा हराएका हुन् भन्नेबारे अहिलेसम्म कुनै स्पष्ट सूचना प्राप्त हुन सकेको छैन ।

 प्रहरी नायब उपरीक्षक टेकबहादुर रावतको कमाण्डमा नेपाल प्रहरी र निकुञ्जका सुरक्षाकर्मीहरूको संयुक्त टोली जङ्गलतर्फ परिचालन गरिएको छ ।

निकुञ्जको विशाल र अप्ठ्यारो भूभागका कारण खोजी कार्यमा केही चुनौती थपिए पनि सुरक्षा निकायले सम्भावित क्षेत्रहरूमा निगरानी र गस्ती बढाएको छ ।