शहीद घोषणाको प्रमाणपत्र लिएर गोविन्दको घर पुग्दा पनि राहतको पत्तो छैन

गत साता भारतीय एसएसवीले गोली हानी हत्या गरेका गोविन्द गौतमका परिवारलाई इलाका प्रशासन कार्यालय त्रिभुवनवस्तीका प्रमुखले शहीद घोषणाको प्रमाणपत्र बुझाएका छन् ।

गृह मन्त्रालयको निर्णय उल्लेखित पत्र बोकेर इलाका प्रशासन प्रमुख नगेन्द्रप्रसाद जोशीले आग गोविन्दका परिवारलाई भेटेका हुन् । सरकारले तत्काल राहत उपलब्ध गराउने भने पनि इलाका प्रशासन प्रमुख जोशीले राहत प्रक्रियामा रहेको भन्दै छिट्टै आउने आश्वासन दिए ।

एसएसबीको गोलीले मारिएका नेपाली नागरिकका परिवारलाई साहनुभुतिका लागि अहिलेसम्म कञ्चनपुरका प्रमुख जिल्ला अधिकारी आनन्दबजार पुगेका छैनन् । यसबारे प्रश्न गर्दा प्रजिअ मनोहर प्रसाद खनालले, ‘यस्तो अप्ठेरो प्रश्न नगर्नुस् न’ भन्दै हाँसेर टारे ।

गत बिहीबार सीमा विवादपछि भएको प्रदर्शनमा भारतीय एसएसवीले गोली चलाउँदा कञ्चनपुर पुनर्वासका ३० बर्षीय गोविन्द गौतमको मृत्यु भएको थियो । सरकारले उनलाई तत्काल राहत उपलब्ध गराउने भने पनि ८ दिन बितिसक्दा राहतको अत्तोपत्तो छैन ।