अन्तिम खेलमा बेंगलुरुको जितले हैदरवादलाई झट्का, कोलाकातालाई मौका

काठमाडौं । भारतमा जारी आईपीएल १२ को आफ्नो अन्तिम खेलमा रोयल च्यालेन्जर्स बेंगलुरुले जित हात पार्दा प्लेअफ दौडमा रहेको सनराईजर्स हैदरावादलाई झट्का लागेको छ ।

बेंगलुरुको एम चिन्नास्वामी मैदानमा भएको घरेलु टिम बेंगलुरु र हैदरवादबीचको खेलमा बेंगलुरु ४ विकेटले विजयी भयो । १७६ रनको लक्ष्य पाएको बेंगलुरुले १९ ओभर २ बलमा ६ विकेट गुमाएर लक्ष्य प्राप्त गरेको थियो । उसका लागि उमेस यादवले अन्तिम ओभरको दुई बलमा लगातार दुई चौका प्रहार गर्दै आफ्नो टिमलाई सान्त्वना जित दिलाए ।

पहिला ब्याटिंग गरेको हैदरावादले कप्तान केन विलियम्सनको अर्धशतकका मद्दतले १७५ रनको चुनौतिपूर्ण स्कोर बनाएको थियो । जवाफी ब्याटिंग गरेको बेंगलुरुले पावर प्लेमै पार्थीव पटेल, विराट कोहली र एबि डिभिलियर्सको विकेट गुमाएपछि हैदरावादले खेल जित्ने अनुमान गरिएको थियो । तर, जारी आईपीएलमा खराब प्रदर्शन गरिरहेका वेष्टइण्डिजका सिमरोन हेटमेर र गुरकीत मान सिंहले शतकीय साझोदारी गर्दै बेंगलुरुलाई जित नजिक पुर्याए । बाँकी काम उमेश यादवले गरे ।

हेटमेरले ४७ बलमा ७५ रन बनाए भने सिंहले ४८ बलमा ६५ रन बनाए ।

खेलमा पराजय भएपछि अब प्लेअफमा पुग्न हैदरावादले कोलकाता नाईट राईडर्स र मुम्बई इण्डियन्सबीचको खेलको नतिजा कुनुपर्ने भएको छ । सो खेलमा कोलकाता पराजित भए हैदरावाद प्लेअफमा पुग्नेछ भने कोलकाता विजयी भए विजयी टिम प्लेअफमा पुग्नेछ । हाल कोलकाता र हैदरावाद दुबैको १२–१२ अंक छ । यद्यपी रनरेट हैदरावादको राम्रो भएकाले हाल अंक तालिकाको चौथो स्थानमा हैदरावाद छ ।