आज अन्तर्राष्ट्रिय आप्रवासन दिवस विभिन्न कार्यक्रम गरी मनाइँदै

काठमाडौं । आज १८ डिसेम्बर अन्तर्राष्ट्रिय आप्रवासन दिवस विभिन्न कार्यक्रम गरी मनाईदैछ ।

श्रमको सम्मानः राष्ट्रिय अभियान र सिपयुक्त जनशक्ति र स्वरोजगारः आर्थिक समृद्धिको मुल आधार भन्ने नाराका साथ आप्रवासीको अधिकारका विषयमा विभिन्न कार्यक्रम हुँदैछन् । सन् १९९० डिसेम्बर १८ तारिखमा आप्रवासीहरुको अधिकार संरक्षणसम्बन्धी राष्ट्रसंघीय महासन्धि अनुमोदन गरिएको सम्झनामा यो दिवस मनाउन थालिएको हो । अहिले विश्वमा आप्रवासनको समस्या जटिल बन्दै गएको छ ।

अहिले विश्वका झण्डै २५ करोड ८० लाख मानिस आप्रवासीका रुपमा रहेका छन् । विश्वव्यापीकरण, औद्योगिकीकरण, सूचना र सञ्चारको विस्तारसंगै अन्तर्राष्ट्रिय स्तरमा आप्रवासीको संख्या बढ्दै गएको छ । राजनीतिक अस्थितरताका कारण नेपालमा पछिल्लो समयमा रोजगारीका लागि विदेशिनेको संख्या बढेको श्रम तथा रोजगार मन्त्रालयले जनाएको छ । यसैबीच प्रधानमन्त्री केपीशर्मा ओलीले अप्रवासन दिवसका अवसरमा शुभकामना दिनुभएको छ । उहाँले दक्ष र सीपयुक्त कामदारको परिश्रमबाट मात्र देशले आर्थिक समृद्धि हासिल गर्ने बताउनुभएको छ ।