कतिले दिए कुथेली बुखरी स्मल हाइड्रोको आईपीओमा आवेदन ?

काठमाडौं । कुथेली बुखरी स्मल हाइड्रोपावर लिमिटेडको आइपिओमा ११ लाख ८ हजार २ सय ३२ जनाको आवेदन दिएका छन् । कुथेलीले यहि असार २६ गतेदेखि आईपीओ निष्काशन खुला गरेको थियो ।

आइपिओमा आज साँझ ५ बजेसम्म आवेदन दिने अन्तिम दिन थियो । लिमिटेडको १ अर्ब १८ करोड ९० लाख ६ हजार रुपियाँ बराबरको १ करोड १८ लाख ९० हजार ६० कित्ताका लागि आवेदन परेको बिक्री प्रबन्धक एनएमबि क्यापिटलले जनाएको छ ।

कम्पनीले सर्वसाधारणलाई १ लाख १ हजार १ सय ५१ कित्ता शेयर निष्काशन गरेको थियो ।

सर्वसाधारणका लागि छुट्याइएको आईपीओ १० हजार १ सय १४ जनाले १०–१० कित्ता र १ जनाले ११ कित्ता पाउने छन् ।

कम्पनीले यसअघि नै आयोजना प्रभावित स्थानीय र श्रम स्वीकृति लिई विदेशमा कार्यरत नेपालीको लागि शेयर निष्काशन गरि बाँडफाँड गरिसकेको छ ।

कम्पनीले दोलखा जिल्लाको भिमेश्वर नगरपालिकामा ०.९९८ मेगावाटको सुस्पा बुखारी खोला जलविद्युत आयोजना निर्माण सम्पन्न गरी २०७२ असोज ३ गते देखि विद्युत उत्पादन गरिरहेको जनाएको छ ।