कसरी बित्यो प्रधानमन्त्री ओलीको एक महिना ?

केपी ओली प्रधानमन्त्री बनेको एक महिना पूरा भयो । कार्यदिनलाई छाड्ने हो भने पनि ओलीले काम गर्ने पच्चीस दिन पाइसकेको मान्नुपर्छ । यो एक महिनामा ओलीले केके गरे ? उनले मन्त्रिमण्डल विस्तार गरे । यही हो मुख्य काम । संविधान अनुसार ६० महिनाका लागि प्रधानमन्त्री बनेका ओलीले एक महिना खर्च गरिसकेका छन् । बाँकी रहेको ५९ महिनामा उनले केके गर्लान् ?

कोही मन्त्री भन्छन् पाच वर्षमा काठमाडौंमा मास्क लगाएर हिंड्न नपर्ने बनाउँछौं । कोही मन्त्री भन्छन्, पाच वर्षमा रेल ल्याइसक्छौं । मन्त्रीपिच्छेका गर्न सक्ने नसक्ने भनाई सार्वजनिक भएका छन् । तिनले गरेका घोषणा पूरा हुने हो भने निश्चित छ, नेपाल छिट्टै स्वर्ग बन्नेछ । तर, भन्नु र गर्नु फरक कुरा हो । भन्न सजिलो छ, गर्न गाह्रो छ । केपी ओलीले उपप्रधानमन्त्री बनाउँदिन भने । भनेको कुरा पूरा गरे । उपप्रधानमन्त्री नबनाएर राम्रो काम गरे । तर, यसको साइड इफेक्ट देखियो । मन्त्रालयको संख्या थपे । उपप्रधानमन्त्री बनाउ“दिन भनेर अड्न सक्ने ओली मन्त्रालय थप्ने मामिलामा चाहिं ७२ घण्टा पनि अड्न सकेनन् । यसको अर्थ हो, ओलीलाई सजिलो छैन प्रधानमन्त्री पदमा बसेर काम गर्न ।

वास्तवमा सजिलो काम होइन पनि प्रधानमन्त्री पद चलाउन । ओलीले दुईटा मधेसवादी दललाई सरकारमा ल्याउने भनेका छन् । तिनलाई कहिले सरकारमा ल्याउँछन् थाहा छैन । राजपा र फोरमलाई सरकारमा ल्याउनुको उपादेयता र औचित्य पनि खुलाएका छैनन् ।

यो एक महिनामा ओलीले ठोस केही गरेका छैनन् । शायद केही गर्ने ठोस योजना बुनिरहेका छन् । हेक्का रहोस्, ६० महिनामध्ये एक महिना खर्च भइसक्यो । हो, यो एक महिनामा ओलीले केही गर्ने लक्षण देखाएका छन् । उनले विगतका सरकारहरुको जस्तो लुट अभियान नचलाउने लक्षण देखाए । यो एक महिनामा ओलीले कुनै चमत्कार गरेका छैनन् तर भ्रष्ट बन्दिन भनेका छन् । र, त्यो अनुसारको व्यवहार पनि देखाउन थालेका छन् । हुन त प्रधानमन्त्री पद चलाउन जति गाह्रो छ त्योभन्दा कम गाह्रो छैन भ्रष्ट नबन्न ।

किनभने सिंहदरबार र बालुवाटार युगौंदेखि भ्रष्टहरुको विशाल र शक्तिशाली घेराभित्र परेको छ । यो घेराबाट उम्कन सजिलो छैन । विगतका प्रधानमन्त्रीहरुलाई पनि सजिलो भएन, ओलीलाई पनि सजिलो हुने छैन । यद्यपि ओलीले भ्रष्टतन्त्रको घेराबाट उम्किने मात्र होइन, भ्रष्टतन्त्रलाई नसहने समेत भनिसकेका छन् ।

ओलीले आगामी दिनमा के गर्छन् ? अहिलेसम्म कुनै लोकप्रिय कार्यक्रम घोषणा गरेका छैनन् । संसदमा दिएको भाषणमा उनले कुनै बेग्लै लोकप्रिय कार्यक्रम नल्याउने, चुनाव घोषणापत्रलाई नै कार्यान्वयन गर्ने स्पष्ट संकेत दिएका छन् । अनि, उनले खटाएको ठाउँमा जान नमान्ने कर्मचारीलाई गोल्डेन ह्याण्डसेकबाट विदा नगरेर कारवाही गर्ने भनेका छन् । कर्मचारीलाई कारवाही गर्न सजिलो छैन । किनभने नेपालमा कर्मचारीभित्रको माफियातन्त्र र युनियनतन्त्र बहुत बलियो छ । ओलीले आगामी ५९ महिना राम्रोसंग काम गर्ने हो भने कर्मचारीतन्त्रलाई ठीक ठाउँमा ल्याउन सक्नुपर्छ ।

मन्त्रिपरिषद् मनखुसी बनाएपनि ओलीलाई पार्टीभित्रका नेताहरुबाट पूरै सहयोग मिलिरहेको देखिन्छ । मन्त्रिमण्डल विस्तारमा गुटले प्राथमिकता पाएपछि असन्तुष्टि स्वाभाविक हो । मन्त्रिमण्डल बनाउँदा सबै अट्दैनन्, सबै नअटेपछि विरोध हुनु र असन्तुष्टि हुनु स्वाभाविक नै हो । मन्त्रिमण्डल विस्तारमा त्यति ठूलो असन्तुष्टि सुनिएन, एमाले पार्टीभित्रबाट खास विरोध पनि सार्वजनिक भएको छैन । यसको अर्थ हो पार्टीभित्रबाट ओलीलाई पूर्ण सहयोग मिलिरहेको छ ।

सत्ता सहयात्री तथा भावी पार्टी सहकर्मी माओवादी केन्द्रबाट पनि ओलीलाई सहयोग नै मिलिरहेको छ । प्रतिपक्षमा रहेको कांग्रेसले केही लछारपाटो लगाउने अवस्था छैन, कांग्रेसको विरोध अर्थहीन हुने अवस्था छ । निष्कंटक राज गरे सरहको अवस्था छ अहिले प्रधानमन्त्री ओलीको । तैपनि एक महिनामा आश गरे जति काम देखिएन । फास्सफुस्समै बित्यो । आशा गरौं, भविष्यका लागि बाँकी ५९ महिना उपलब्धिमूलक हुनेछ ।

– गोपाल बुढाथोकी