कृषि विकास बैंक लुट प्रकरणमा थप ३ जना समातिए

काले भनिने पिटरको योजनामा भारतको मुम्बईमा बसेर कृषि विकास बंैकको रकम लुटिएको प्रकरणमा प्रहरीले थप ३ जनालाई पक्रिएको छ । महानगरीय अपराध महाशाखाको टोलीले आज शुक्रबार ३ जनाको पक्राउ गरेको हो । पक्राउ पर्नेमा पर्वतका गणेश बस्याल, यज्ञराज भट्ट र मालती देवी न्यौपाने भट्टराई रहेका छन् ।

अनुसन्धानको क्रममा भट्टको खाताबाट ४५ लाख रुपैयाँ, मालतीको खातामा २४ लाख रुपैयाँ फेला परेको महाशाखाका एसएसपी सहकुल थापाले जानकारी दिए । यो प्रकरणमा अहिलेसम्म १६ जना पक्राउ परिसकेका छन् । कृषि विकास वैंकको रकम लुटिए पछि प्रहरीले गत बुधबार १२ जनालाई पक्राउ गरी पत्रकार सम्मेलन गर्दै सार्वजनिक गरेको थियो ।

हिजो विहिबार पनि प्रहरीले यसै प्रकरणमा स्याङजाबाट प्रतिक्षा निर्माण सेवाका प्रोपाइटर रामकृष्ण भुषाललाई नियन्त्रणमा लिएको थियो । तिमल्सेनाको खातामा प्रहरीले ६५ लाख रुपैयाँ फेला पारेको थियो । बैंककै कर्मचारीको युजर आइडी प्रयोग गरेर ४ करोड ७३ लाख ९६ हजार रुपैयाँ व्यक्तिको नाममा ट्रान्सफर भएपछि अहिले नेपालका बंैकहरुको साइबर सुरक्षा प्रति सर्वत्र चिन्ता हुन थालेको छ । यस्तै प्रकरणमा केही समय अघि केही चिनियाँ ह्याकरले पनि नेपालका बैंकबाट करोडौ रुपैयाँ लुटेका थिए ।