कोरोना संक्रमणका कारण पूर्वन्यायाधीशसहित थप १० जनाको मृत्यु

नेपालमा कोरोना संक्रमणका कारण थप १० जनाको मृत्यु भएको छ । कोरोना संक्रमणको कारण पूर्वन्यायाधीश माधवप्रसाद चालिसे सहित १० जनाको मृत्यु भएको पुष्टि भएको हो । ७० वर्षीय पूर्वन्यायाधीश चालिसेको काठमाडौंको बाँसबारीस्थित गंगालाल हृदयरोग केन्द्रमा मृत्यु भएको हो । चालिसे ५ दिनदेखि गंगालालमा उपचाररत हुनुहुन्थ्यो । उपचारकै क्रममा उहाँलाई कोरोना संक्रमण पुष्टि भएको थियो । काठमाडौं निवासी चालिसे तत्कालीन पुनरावेदन अदालत पोखराका मुख्य न्यायाधीशबाट अवकाश हुनुभएको हो ।

यस्तै, कोरोना संक्रमणबाट केन्द्रीय कारागार सुन्धाराका १ कैदीको मृत्यु भएको छ । कारागारका ३ कैदीको मृत्यु भएकोमा १ जनामा कोरोना संक्रमण पुष्टि भएको जेलर लक्ष्मी बाँस्कोटाले जानकारी दिनुभयो । मेगा अस्पतालमा मृत्यु भएका कैदीमा कोरोना पुष्टी भएको हो । केन्द्रीय कारागारका ५२ जना कैदीबन्दी र कारागारको सुरक्षामा कार्यरत ५६ प्रहरीमा कोरोना संक्रमण पुष्टि भएको छ ।

उता, चितवनमा कोरोना कारण १८ वर्षीया युवती सहित ४ जनाको मृत्यु भएकोे छ । मृत्यु हुनेमा भरतपुर महानगरपालिकाकी १८ वर्षीया युवती, ६५ र ७८ बर्षीय २ पुरुष र खैरहनी नगरपालिकाकी ५५ वर्षीया महिला रहेका छन् ।

यस्तै कोरोनाबाट वीरगञ्जमा थप ३ जनाको मृत्यु भएको छ । मृतकहरुमा अस्थायी कोभिड विशेष अस्पताल वीरगञ्जमा उपचार गराइरहेका वीरगञ्ज महानगरपालिकाका ५३ वर्षीय पुरुष र बाराको कोल्भी गाउँपालिकाका ६० वर्षीय पुरुष रहेको जिल्ला प्रशासन कार्यालय पर्साका प्रशासकीय अधिकृत विनयप्रसाद श्रीवास्तवले जानकारी दिनुभयो ।

त्यस्तै, पर्सामा नै नाम, ठेगाना नखुलेको १ जना बेवारिसे पुरुषको पनि कारोनाको कारण मृत्यु भएको छ । गत भदौ १३ गते सडकमा वेवारिसे अवस्थामा भेटिएका अन्दाजी ६० वर्षीय पुरुषको उपचारको क्रममा मृत्यु भएको हो ।

यस्तै, हिजो साँझ मृत्यु भएका धरानका एक पुरुषमा पनि कोरोना संक्रमण पुष्टि भएको छ । धरान उपमहानगरपालिका वडा नं. ११ बस्दै आएका ६५ वर्षीय पुरुषमा मृत्युपछि कोरोना संक्रमण पुष्टि भएको उपमहानगरपालिका स्वास्थ्य शाखा प्रमुख उमेश मेहताले जानकारी दिनुभयो ।